මාලා හොට් පොට් ( Mala Hot Pot)-කළඹ්බො සිටි සෙන්ටර් (Colombo City Centre Food Studio)

මාලා හොට් පොට් ( Mala Hot Pot)-කළඹ්බො සිටි සෙන්ටර් (Colombo City Centre Food Studio)

මේසය මැද සවිකර තිබෙන උදුනක පිසෙන අහාර එසැනින් රස බැලීමේ අපූරු හැකියාවක්  තිබෙන ස්ථානායකට ඔබ වඩාත් ඇලුම් කරනවා නිසැකයි. විදෙස් රටකදී නම් ඇතැම්විට ඔබට එවැනි තැන් සොයා ගැනීම අපහසු නැහැ. නමුත් තවමත් ශ්‍රි ලංකාවේ මෙවැනි ආහර පරි‌භෝජන විධික්‍රම පිළිබදව අත්දැකීම් ලබා ගැනීමට තිබෙන ස්ථාන දුලබයි.

මාලා අවන්හල පිහිටලා තියෙන්නෙ කළම්බො සිටි සෙන්ටර්හි ඉහළ මාලයේ. ඔයාලා සාප්පු සවාරියේ ගිහිල්ලා බඩගින්නක් දැනුනම මාලා අවන්හලට අවා නම් අලුත් අත්දැකීමක් ලබා ගන්න පුළුවන්. හැබැයි දැන් මේක බලලා එක පාරටම දුවගෙන යන්න එපා මෙසේ මැද අහාර උදුන් තියෙන තැනක් කියලා. මාලා ඒක ඒ වෙනුවෙන් සුදානමක් තියෙන තැනක් විතරයි තවමත්, හැබැයි නුදුරේදී එය යථාර්ථයක් වෙන්නත් පුළුවන්. 

චීන අවන්හලක් වන මෙහි දැනටමත් තිබෙන විශේෂත්වයක් තිබෙනවා ඊටත් ඔබ ඇලුම් කරානවා නිසැකයි. ඔබට අවශ්‍ය එළවළු මේ ස්ථානයේදී අමුවෙන් අවශ්‍ය ප්‍රමාණයට තෝරාගෙන, එක් බදුනකට දමා දී එය ආහාරය විධියට කෙටි වේලාවක් තුළ පිළියෙල කර ගැනීමේ හැකියාව මාලා අවන්හලෙ තිබෙනවා.

එවිට වීගන් ලැදි ඔබට ඔබ කැමැති එළවළු , සොයා නිෂ්පාදන, මුහුදු පැලෑටි, මේ ඔනෑ දෙයක් සිය ආහාරයට එක්කර ගැනීමට හැකියාව තිබෙනවා. අපුරු සුප් වර්ග මෙන්ම ඇලෙන සුළු කුඩා බත් බදුන මෙම ස්ථානයට විශේෂිතයි.

සුරම්‍යයා තමයි මෙම අවන්හලට වඩාත් ප්‍රිය කරන්නෙ. ඇය මාලා අවන්හලේ මෙයටත් පෙර අත්දැකීම් ලබපු තැනැත්තියක්. අද නම් සුරම්‍යා, තඩ්සාජනී ඔබ වෙනුවෙන්මයි මාලා අවන්හලට ගොඩ වැදුනෙ. හැබැයි මෙතන සම්පුර්ණයෙන්ම නිර්මාංශ ආහාර තිබෙන තැනැක් නම් නොවන බවත් ඔබට කියලා තියන්න අවශ්‍යයයි.

බත්, නුල්ඩස් හෝ වෙනත් ආහාරයක් සමග එළවළු මිශ්‍ර සලාදයක්, චීන ක්‍රමයේ ආහාරයක් සකස්කරවා ගැනීම ඉතා පහසුයි. ඒ විතරක් නෙමෙයි ඔබ තෝරාගන්නා එළවළු යොදා ඔබට අවශ්‍ය සුප් සහිත අහාරයක් ලෙස සකස්කරවා ගැනීමේ හැකියාවද මාලා අවන්හලේ තිබෙනවා.

මේක එතරම් රසවත් දැයි මම මුලින් විශ්වාස කළේ නැහැ. නමුත් ඒ අත්දැකීම ලබාගත්තාම අහාරයේ රස ගුණ ගැන මට පුදුම අත්දැකීමක් ලබා ගැනීමට හැකිවුණා. සුරම්‍යා මාලා අවන්හල ගැන අත්දැකීම් විස්තර කළේ එහෙමයි. එවැනි විස්තරයක් කරමින් මෙවර මාලා අවන්හලේ රස බලන්න ඇය ආරාධනා කළේ තඩ්සාජනීටයි.

මාලා යැයි කියු සැනින් අපට කාන්තාවකගේ නමක් සිහියට ඒම සැබෑවක්, හැබැයි ලංකාවේ අපට මාලා නම තවත් සමීපයි. ඒ කාන්තාවකගේ රුවක් මනසේ විචිත්‍රණය කරන නිසා. කොටින්ම මාලා නම තියෙන බොහෝ පිරිසක් මෙරට සමාජියේ සිටිනවා. 

හැබැයි ඒ නිසාම මාලා එකේ හමුවෙමු, මාලා එකට යමු වගේ අපි ව්‍යවහාර කරන විට අසන්නා සිහියෙන් අසා නොසිටියොත් ගැටලු කිහිපයකට මුහුණ දෙන්නත් පුළුවන්. ඒත් ඒ පිරිමි පාර්ශවයට විතරයි. සුරම්‍යයටත් එහෙම අකරතැබ්බ වෙලා නැත්තෙම නෑ වගේ අපට හිනාවෙන විධියෙන් ඒ ගැන තේරුම් ගියා. කොහොම වුණත් මේ මාලා නම් ඔයාලා දවසක බලන්න එන්නම වුවමනායි. 

ඇයි මාලා කියන්නෙ කියලත් සුරම්‍යාම සොයා ගත්තා. මේ අවන්හලේ චීන හිමිකාරිනියගෙ නම මාලා කියලයි සුරම්‍යා කලින් හිතුවේ. නමුත් මේ මාලාට එහෙම සම්බන්ධයක් නැහැ.  ඇත්තටම චීන ජාතිකයන් ගම්මිරිස් අඩංගු රසවත් මිශ්‍ර කුළු බඩු වර්ගයකට මාලා ලෙස නම් ලබා දී තිබෙනවා. මේ මාලා ඒ මාලා කියලා ඒත්තු ගියාම සුරම්‍යටත් හිනාව නතර කරගන්න බැරි වුණා. තඩ්සාජනී ඒ ගැන හිතමින් සිනාසෙන්නට වුවාය. සුරම්‍යා ආහාර ඇණවුමට පිටත්වුයේ ඒ අතරය.

මෙම ඇණවුම ලබා දීමට ක්‍රියාවලියක් නැතිනම් උපදෙස් පිළිපැදීමක් කළ යුතුයි. අපි එය ඔබට මෙසේ පෙළ ගස්වන්නම්. 

1. තැටියක් තෝරන්න

2. තෝරාගැනීමෙන් ඕනෑම එළවළු ප්‍රමාණයක් ගන්න

3. ඔබේ කුළුබඩු මට්ටම මෘදු, මධ්‍යම හා ඉහළ සිට තෝරන්න

4. ඔබේ තැටි කිරා මැන බලා ඒ අනුව ගෙවන්න

5. ඔබට ලබා දී ඇති ටෝකනය රැගෙන අවශ්‍ය බීම වර්ගය සොයන්න.

6. උපාංගය බීප් නාදය කළ පසු ඔබ යා හැකියි.

ඔබ තෝරණ එළවළු වර්ගවල බර ප්‍රමාණය අනුව ගෙවීම සිදුවන නිසා ඇතැම්විට මෙම ක්‍රමය ඔබගේ කෑම පාලනය වීමටත් හේතුවක් වනු ඇති.

සුරම්‍ය ගත්ත දෑ ඔන්න කියන්න යන්නෙ. කංකුං, කැරට්, මල් ගෝවා,දැව හතු, කළු හතු, ටෝෆු, Pak Choi සහ නුල්ඩ්ස් තිබුණා. අප එහි යනවිට මුහුදු පැලෑටි නොතිබිණි. සුරම්‍යාගේ මුහුණ ඇදවී ගියේ මුහුදු පැලෑටි අවසන් යැයි කී නිසාය.

මගේ පපුව හෝස් ගාලා ගියා සුරම්‍යා කීවාය.  අනතුරුව වුයේ මාලා තෝරා ගැනීමය. මාලා තෝරා ගැනීමේදී මෘදු මට්ටමේ කුළුබඩු ප්‍රමාණයකට ඇලුම් කළ නිසා මධ්‍යම ප්‍රමාණයෙන් මාලා තෝරා ගැනීමට සුරම්‍යා පෙළඹුණාය.

අර මුලින් කිව්වා වගේ උණුසුම් බදුනක් තවමත් මාලා අවන්හලේ මේසය මැද නොමැති නිසා, එහි සේවකයන් ඔබට එය පිළිගන්වීමකුයි සිදුවන්නෙ, සුප් වැනි එළවළු මිශ්‍රව, මාලා තුනපහ යෙදු අහාරය සමග ඔබට ඇලෙන බත් බදුනකුත් ලැබෙනවා.

චීන සම්ප්‍රදායට චොප් ස්ටික් (කුරූ ) භාවිතාකරමින් වුවද මෙම ස්ථානයේ පහසුවෙන් ආහාර පරිභෝජනය කළ හැකියි. නමුත් සුරම්‍යත් තඩ්ෂජනීත් තෝරා ගත්තේ හැදි ගෑරුප්පු. අපිට මේවා හොදයි නේ සුරම්‍යා කීවාය.

අර සම්පුර්ණ වශයෙන් උණුස් බදුනක නටන ආහාර ගෙන කටට දමා ගැනීමේ අවස්ථාවක් නැතත් සුරම්‍යා කියන විධියට නම් මාලා කුළුබඩු ඔබගේ රස නහර පිනායනවා. මෙම මෘදු අහාරවේල ඉතාම රසවත්. වීගන් ඔබට මෙය අලුත් අත්දැකීමකට අවස්ථාවක්. ඇතැම් අය බොහෝවිට මේ අත්දැකීම ලබාගෙන ඇති. නමුත් ඒ අත්දැකීම නොගත්ත අයට මෙය ඉතා රසවත් අත්දැකීමක් වනවා නොඅනුමානයි. 

අප මේ සියල්ලටම වැයකළේ රුපියල් 900.00 පමණයි. 

ඔන්න අපි තැන ගැන කිව්වා. ඒ පැත්තෙ ගියොත් වීගන් ඔබට මෙහි කදිම අහාර වේලක් ගත හැකියි. බිරිදට පවසා යන්න මාලා හමුවෙන්න යනවා කියලා, නැතිනම් මාලා හමුවෙන්න අපි යමුද ? අහන්න. එවැනි ප්‍රශ්න අහලා යමක් වුණොත් ඔන්න මම නම් නෙමෙයි. හැබැයි වීගන් ලෝලියෙක් විධියට මම නම් මාලාව බලන්න යනවා මයි. 

එහෙනම් අදට නවතිනාවා. ලෝකය ලස්සන කරන අපූරු අහාර රටාව වීගන්…ජයවේවා ! 

තායි (Thai)-කළම්බො සිටි සෙන්ටර්

තායි (Thai)-කළම්බො සිටි සෙන්ටර්

නිර්මාංශ ආහාරවලට පුරුදු ඔයාල වෙනුවෙන් වෙන්වෙලා තියෙන අවන්හල් සොයා ගෙන යාම තමයි Meatless Monday Sri Lanka කණ්ඩායමේ අරමුණ වෙන්නේ. මීට කලින් ඔබට මතක ඇති අපි Mala Hot Pot වෙත ඔබව කැඳවාගෙන ගියා.

අද අපි කියන්න යන්නේ තායි අවන්හල ගැන.මේ අවන්හල හරියටම  පිහිටලා තියෙන්නෙත් Mala Hotpot අවන්හලට දකුණු පැත්තෙන්. ඒනිසා ඔන්න ඔයාලට බලාගන්න අපහසු නැහැ . වෙනදා වගේම 

අපේ ගමනට හැමදාමත් එක් වු තඩ්ෂාජනී නූඩ්ල්ස් කන්න  ආසාවෙන් හිටියා කියලයි සුරම්‍යා කියන්නෙ.ඒ නිසාම ඔන්න අපි වීගන් යාලුවෝ වෙනුවෙන්ම තායි අවන්හලේ නූඩ්ල්ස් කන්න තීරණය කළා . අපේ යාලුවාවත් සතුටු කරන ගමන්.

තායි අවන්හලේ වට්ටෝරුව තරමක් සීමා සහිතයි.එහෙම වුණත් ඔබ ප්‍රියකරන බොහෝ ආහාර මෙම ස්ථානයෙන් ලබා ගන්න පුළුවන්.ආහාර වට්ටෝරුව අනුව බත් නූඩ්ල්ස් වර්ග සහ සලාද විවිධ ක්‍රම වලින් ඔබට ඇණවුම් කළ හැකියි.මෙහි ඇති තවත් විශේෂත්වයක් තමයි තායි ව්‍යඤ්ජන.

අපි ඔබටත් අත්දැකීම් කියන්න එක්ක නිර්මාංශ නූඩ්ල්ස් සහ පැපොල් සලාදයක් අපේ ආහාරවේලට  තෝරා ගත්තා .අපේ සේවා දායකයාට විශේෂයෙන් මතක් කරලම කිව්වා මස් මාළු හෝ බිත්තර අඩංගු කිසිදු ද්‍රව්‍යක් අපේ ආහාර වේලට එක් කරන්න නම් එපා කියලා.

නූඩ්ල්ස්  සම්පූර්ණයෙන්ම නිර්මාංශ ආහාර වේලක් ලෙස හැඳින්වුයේ නැතත් නිර්මාංශ ආහාර අගය කරන ඔබට මෙය හොඳ විකල්පයක්.

මේ වන්හලට ඇවිල්ලා ආහාර ඇණවුම් කිරීම ඉතා පහසුයි.ඒ නිසා ආහාර ඇණවුම් කරලා අල්ලාප සල්ලාප යෙදෙන්නත් අපට අවස්ථාව ලැබුණා. ඇණවුම් කිරීම වගේම ඇණවුම ඉතා කඩිනමින් අපගේ මෙසේ මතටත් ආවා.

තඩ්ෂාජනීටයි සුරම්‍යටයි හරිම සතුටුයි.නූඩ්ල්ස්  එළවළු සමූහයක් සහ සෝස් සමග මිශ්‍ර වී තිබුණා . ප්‍රනීත සුවඳක්. ඈත තියාම දැක්ක ගමන් කන්න හිතෙන හැගීමක් එන එක වළක්වන්න බැහැ.

ඔබ දන්නවා ඈත අතීතයේ පටන්ම නිර්මාංශ ආහාර ශ්‍රී ලංකාවේ ඉතා ප්‍රචලිතයි.එසේ වුවත් අපි පරිස්සම් විය යුතුයි මේ නිර්මාංශ ආහාර තෝරා ගැනීමේ දී. ඇතැම් විට ඔබ රැවටීම්වලට ලක් විය හැකියි.

චිලි පේස්ටවල කූනිස්සන් වැනි මාංශ ඇතුළත් විය හැකියි, ඒ නිසාමයි අපි මේ වගේ අවන්හලකට ඇවිත් ආහාර ඇනවුම් කරලා ඔබ වෙනුවෙන් ඒ තතු නිවැරදිව ගෙන එන්නේ. අපට මේ අවන්හලේ දීත් එවැනි ම අත්දැකීමකට මුහුණ දීමට සිදු වුණා.

ඔවුන් සිදු වුණු වැරැද්ද නිවැරදි කිරීමට බොහෝ උත්සාහ කළා. අප මෙතැනදි අවබෝධයෙන් සිටි නිසා කිසිම ගැටළුවක් වූයේ නැහැ . ඒ අර කියපු චිලි පේස්ට් නිසා.

ඔන්න නූඩ්ල්ස් අර කලින් කිව්ව වගේ රසයෙන්ද අනූනයි. සුරම්‍යා වඩාත් ආදරේ කලේ උමාමි රසයට.මේ අත් දැකීම ගැන තඩ්ෂාජනී සිටියේ සතුටින්. අපි ප්‍රිය කළ එළවළු වර්ග රැසක් එහි දක්නට තිබුණා. කැරට් වට්ටක්කා ටෝෆු, ලූණු එහි නියමිත පරිදි යොදා තිබීම අපගේ සතුටට හේතු වුණා.

අප ඇණවුම් කළ පැපොල් සලාදයේ කැරට් බෝංචි තක්කාලි රට කජු ඇතුළු රසවත් දෑ වලින් සමන්විත වුණා. මෙය අප ලැබූ තවත් ජයග්‍රහණයක් ! සුරම්‍යා තඩ්ෂාජනී දෙස බැලුවේ එවැනි ලීලාවකින්. අපි කිව්වෙ අපිත් එක්ක එකතුවෙලා ඉන්න වීගන් යාලුවො හැමෝම.

ඉතිං ඔන්න ඔබ නිර්මාංශ ආහාර වේලක් ඉක්මනින් ලබා ගන්න කියලා හිතනවා නම් නොවැරදීම තායි අවන්හල තෝරාගන්න.

අපි අලුත් තැනක් ගැන ඔබට තොරතුරු ගෙන ආවා .ආයේ දවසක නිර්මාංශ ආහාර වේලක් සමග හමු වෙමු .එතෙක් පරිස්සමෙන් ඉන්න .නිර්මාංශ ආහාර අගයන ඔබට ජයෙන් ජය වේවා !

රමේෂ් වරල්ලෙගම 

යාල්  – 30, සී වීව් ඇවනියු, කොළඹ 03

යාල් – 30, සී වීව් ඇවනියු, කොළඹ 03

යාල් යමු කියපු ගමන් ඔබට යාපනයේ යමු වගේ අදහසක් එනවා නිසැකයෙන්ම, හැබැයි මේ අපි කියන්න යන්නේ යාල් පානම් ගිහිං කන්න පුළුවන් රස වීගන් කෑම තියෙන කොළඹ 03, සී වීව් ඇවිනියු, අංක 30 ස්ථානයේ තිබෙන යාල් අවන්හල ගැන.

ඔබට යාපනයට ආවේනික වීගන් කෑම වර්ග ලබා ගන්න පුලුවන් තැනක් තමයි යාල් අවන්හල. මැරීන් ඩ්‍රරයිව් එකේ යාල් රෙස්ටුරන්ට් එක කොහෙද කියලා ඇහුවත් මේ තැන පහසුවෙන්ම සොයාගන්න පුළුවන්. 

වෙජිටේරින් අයට තමයි යාල් වගේ තැනකත් වැඩිපුර ආහාර තිබෙන්නෙ, හැබැයි වීගන් අයට ඔබටම විශේෂ විධියට ආහාර තෝරා ගැනීමේ හැකියාව මේ අවන්හලේ තිබෙනවා.

තඩ්ෂාජනී, සුරම්‍යා සහ මම මධ්‍යාහනේ යාල් අවන්හලට ආවෙමු. අපට අවශ්‍ය වුයේ ඉතා ඉක්මනින් වීගන් ආහාර වේලක රස බැලීම වුවත් පිපාසය කෙළවරක් නැතිවිය.

මම තෝරාගත් යුෂ පාන කිහිපයක්ම ලබා ගැනීමට නොහැකි ලැයිස්තුවේ තිබීම කණස්සල්ලට හේතුවුවත්, කුමන හෝ යුෂ පානයක් ලබා ගැනීම පිපාසය සන්සිදුවා ගැනීමේ අවශ්‍යයතාව වැඩිකරලීය.

කොමඩු සහ අඹ යුෂ පානය අපගේ සිත් ගත්තේ ඒ අනුවය.  යාල් අවන්හලේ තිබෙන විශේෂත්වය ගැන සුරම්‍යා, තඩ්ෂාජනි කතා කරන්නට වුයේ යාපනයට පමණක් අවේනික නොවන ආහාර හා යුෂ, අතුරු පස මෙම අවන්හලේ තිබීම පිළිබදවය. 

විවිධ වර්ගයේ ව්‍යංජන සමග ලබා ගැනීමට හැකි පිට්ටු,පරාටා, කොත්තු රොටි, ඉදි ආප්ප ඇතුළු ආහාර වර්ග රැසක්ද ආහාර වට්ටෝරුවේ විය. ඒවායින් බොහොමයක් රාත්‍රි කාලයේ පමණක් ඇතැයි අපට සේවා සැපයු සේවාදායකයා පැවැසීය.

මාංශ ආහාරද අලෙවි කරන මෙම ස්ථානයේ වැඩි වශයෙන් යාපනයේ සංස්කෘතියට අදාල ආහාර පානකොළඹ දී  ලබා දීමේ උත්සාහයක් ඇති බව පෙන්නුම් කළේය. පරිප්පු, අර්තාපල්, සුදු ලූණු ව්‍යංජන නිර්මාංශිකයන්ට විවෘත ආහාරය.

තඩ්ෂාජනී තෝරා ගත්තේ එළවළු ෆ්‍රරයිඩ් රයිස්ය, සුරම්‍යා සහ මම සාමාන්‍ය බත් සමග එළවළු අහාර ඇණමුම් කළෙමු. ඒ බත් වර්ග දෙක එකිනෙකට වෙනස්වන විධියටය. මම බාසුමතී බත් ඇණවුම් කළ අතර, සුරම්‍යා සම්බා බත් ඇණවුම් කළාය. 

බත් සමග අනෙකුත් අහාර ද්‍රව්‍ය පිලිගන්වනු ලැබුවේ රීදි පැහැති බදුන්වලය. බත් පිළිගැන්වීමේදී සාම්ප්‍රදායික ලෙස කෙසෙල් කොළයට දැමු බත් සමග , කුඩා බදුන් රැසකට වෙන වෙනම දැමු එළවළු හා ව්‍යංජන පපඩම්ද වුයේය. එතැනින් වෙනස් වුයේ තඩ්ෂාජනීගේ එළවළු ෆයිඩ්රයිස් පමණි.

මගේ සහ සුරම්‍යාගේ ආහාර වේල සමග ලැබුණු රසම්  සහ සව් පානය වඩා ඇලුම්කළ දෑය. තඩ්ෂාජනී සව් කෑමට කැමති බව කීවාය.

එදින විශේෂත්වය වුයේ මෙතුවක් කල් රසම් වෙනමම පානය කිරීමට පුරුදුවී සිටි මට තඩ්ෂාජනී, රසම් බත් එකට දමා ගන්නැයි කළ යෝජනාවය. එහෙමද කන්න ඔන යැයි විමතියෙන් විමසු මම තඩ්ෂාජනීගේ සහ සුරම්‍යාගේ මුහුණු බලමින් රසම් බදුන බත් එකට දමා ගත්තෙමි. එය ව්‍යංජනයක් ලෙස මෙසේ බත් එකට දමාගත් පසු අහාර වේල තවත් රසවිය. 

යාල් අවන්හලේ පළමුව ලැබු මෙම අත්දැකීම කොතරම් යාපනයේදී ආහාර ගත්තත් මා විසින් නොකළ වැඩකි. මෙහි වැරැද්දක් ඇත්නම් කිසිවෙකු විසින් නිවැරදි කරනු ඇත. නමුත් නොදන්නා දේ කා විසින් හෝ පැහැදිලි කරයි නම්. එය නිවැරදි නම් මා ඊට ගරු කළ යුතුය. 

තඩ්ෂාජනී, හින්දු හා දමිළ ජන කොටස් අතර පවතින සාම්ප්‍රදායික සහ සංස්කෘතිමය ආහාර පිළිවෙත් ගැන අහාර ගන්නා අතරවාරයේ කෙටියෙන් පැහැදිලි කළාය. වෙන් වෙන්ව බදුන්වල අහාර ව්‍යංජන පිරීනැමීමට ආදි හේතු කිහිපයක්ද ඇය කීවාය. මට තිබුණේ වීගන් ආහාරයක රස ඔබට කියන අතරේ, කුස ගින්නක්ද නිසා ඇය කියු සියුලු දෑ මට දැන් නම් මතක නැත.

බත් සමග පරිප්පු, අළු කෙසෙල්, තෙල් දැමු බණ්ඩක්කා, පපඩම්වලට අමතරව, බැදපු මිරිස් ඒ සමග විය. සරල කොතරම් ද ඒ තරම්ම රසවත්ය. මේ සුරම්‍යා කියු හැටිය. මම තඩ්ෂාජනීගේ ආරාධනාවෙන් ඇයගේ එළවළු ෆයිඩ්රයිස් එකෙන්ද කොටසක් මගේ පිගානට ගෙන රස බැලුවෙමි. ඇත්තෙන්ම ආහාර ගන්නා විට මේ ආහාර ගුණයෙන්ද අගතැන්පත් යැයි යාල් අවන්හලේ අහාර සමග සිහියට නොආවොත් පුදුමය.

එළවළු ෆයිඩ්රයිස් යාපනයට අවේනික සම්ප්‍රදායික කෑමක් නොවුනද ඊට යොදන කුළු බඩු හා අනෙකුත් ව්‍යාංන නිසා එය නිරායාසයෙන් අනෙකුත් එළවළු ෆයඩ් රයිස් එකකින් වෙනස් වුයේය.

තඩ්ෂාජනී මොහොතින් මෙහොත දෙමළ හුරුවට මෙම අහාර ද්‍රව්‍යවල නම් කීවාය. අප ඇයගෙන් තව තවත් දෑ දැන ගැනීමට වෙහෙස වුයේය. Meatless Monday Sri Lanka Team ( නිර්මාංශ සදුදා ශ්‍රි ලකා ) කණ්ඩායම ලෙස එකම මේසයක විවිධ සංස්කෘතීන්ගෙන්, විවිධ සම්ප්‍රදායන් කරපින්නා පැමිණෙන ආහාර එකට සිට අහාර ගැනීමේ ප්‍රීතියද මේ මොහොතේ අප භුක්ති වින්දේය. 

අහාර ගැනීමෙන් පසු අතුරුපස කෑමට තරම් මට සිත් නොදුන්නත්, සුරම්‍යා අහාර වේලට අතුරුපස එක්කර ගත යුතුයැයි කීවේ ඔබට ඒ ගැන කීමට ඇති අවශ්‍යතාව නිසාය. 

මම නම් මගේ අහාරවේලට ලැබුණු සව් බදුන හිස් කළේය. එය විශාල ප්‍රමාණයක් නොවුනද අහාර වේල සමග පෑහෙන්නට ඇති තරම්ය. මිශ්‍ර පළතුරු සලාදයක් සුරම්‍යාය ඇණවුම් කළ අතර එහි වු කෙසෙල්, ගස්ලබු සහ අන්නාසි නැවුම් පළතුරු පැහැය නොගත් බව මගේ නිර්දේශයයි. සුරම්‍යාද එය අනුමත කළාය. යාල් අවන්හලට පළතුරු ගන්නා වෙළෙන්දා මාරු කිරීමට කාලය පැමිණ ඇතැයි ඇය සිනාසෙමින් කීවාය.

යාල් අවන්හලට යා වුණ මාර්ගයෙන් අනෙක් පස වුයේ තෙරක් නෙපෙනෙන මහ මුහුදයි. රළ ගැටෙන හඩ අතුරින් රේල් පාරේ හූ කියමින් ධාවනය වන දුම්රියක්ද යාල් හි සිටි කාලය තුළ අපි පසුකොට ගියෙමු. 

නැවත රාත්‍රියක එන්නම්. ඇයි රෑට නේ ආහාර වට්ටෝරුවේ බොහෝ කෑම තියෙන්නෙ යැයි අපි අපට සේවය සැපයු සහයකයාට විහිළු කරමින් ආපසු හැරුණෙමු. 

තවත් දවසක මේ වගේ තැනක වීගන් අහාර වට්ටෝරුවක රස මිහිර අරගෙන හමුවෙන්නම්. එතෙක් ඔබට සුබ දවසක් ! 

මම රමේෂ් වරල්ලෙගම 

බෝල්ඩ් – 30, සී වීව් ඇවනියු, කොළඹ

බෝල්ඩ් – 30, සී වීව් ඇවනියු, කොළඹ

කොළඹ 3 වන සී වීව් ඇවනියු දිගේ ඇවිද යන විට තඩ්සා, සුරම්‍යා සහ මට බෝල්ඩ් (Bowl’d) අවන්හල හදුනා ගැනීමට  එතරම් අපහසු වුයේ නැත. පන්දු යැවිය යුතු ඉලක්කය සී.වීව් ඇවිනියු කෙළවරේ පිහිටා  ඇති බව අපගේ ක්‍රීඩා ලෝලී , වීගන් ලෝලී නරඹන්නන්ට, පාඨකයන්ට සහ රසවතුන්ට ඔවුන්ගේ  පහසුව සදහා සිහිපත් කළ යුතුය.

සෞඛ්‍ය සම්පන්න ආහාර ඉතා  ක්ෂණිකව ලබා දීමෙන් Bowl’d අවහන්හල  ආහාර ලෝලීන් අතර ජනප්‍රියවී  තිබේ. ඒ නිසාම වීගන් ආහාර ලෝලීන්වන ඔබ වෙනුවෙන් එහි යන්නට නිර්මාංශ සදුදා කණ්ඩායමේ අපි ( Meatless Monday Sri Lanka Team ) තීරණය කළෙමු.

හැබැයි Bowl’d අවහන්හල  කියන්නෙ  නිර්මාංශ අහාර පමණක් තිබෙන අවන්හලක් නෙමෙයි. Bowl’d අවන්හලේ පදනම අමු මාලු  සමග හවායි සහල්වලින් සැදු බත් , එළවළු  සමග උමාමි සෝස් මිශ්‍ර වු පාත්‍රය (Bowl) එකකි.  නිර්මාංශ සදුදා කණ්ඩායම මෙම අවන්හලට පැමිණියේ සම්ප්‍රදායික අහාර ප්‍රාතය සමාලෝචනය කිරීමට නොවේ. 

වීගන් අහාර පිළිබදව අපගේ සේවා  සහයකයාගෙන් විමසා සිටි අවස්ථාවේ ඔවුන් අපට විවිධ වර්ගයේ වීගන් ආහාර  වට්ටෝරු පිළිබදව දැනුවත් කළේය. ඒ අනුව Bowl’d අවහන්හල  සතුව වීගන් අහාර වට්ටෝරු රැසක් ඇති බව අපට වැටහී ගියේය.

Bowl’d අවහන්හලේ  පිවිසුම් ස්ථානයේ පටන් පවතින අපූරු අලංකාරයක ගැන අහාර ඇනවුමට පෙර පැවැසිය යුතුය. ඒහරිත වත් මල් වැල්වලින් යට  මේසයක් හා පුටුවක් සහිත ස්ථානයකින්ද සැදුම්ලත්ය. එය ඇත්තටම අහාර වේලක් සමග පෙම් සුව විදිය හැකි ස්ථානයක් දැයි බැලු බැල්මටම අදහසක් පහලවනු නියතය.  

අලංකාර ලෙස ඇඳ ඇති වර්ණවත් බිතුසිතුවම් විවිධ බිත්ති සහ ලී ගෘහ භාණ්ඩ වලින් මෙම අවන්හල අලංකාර කර ඇති අතර රැට්න් පැදුරු පොලිනීසියානු කලා හා ශිල්ප සිහිපත් කරයි.

අහාර වට්ටෝරුවේද විවිධ පාත්‍ර ඇත. ඒ අතරින් වීගන් පාත්‍රයක් තෝරා ගැනීමත්, ඊට අවශ්‍යය අහාර තේරීමත් ඔබ සතුය. යුෂ පානයන් නම් බොහෝ දුරට වීගන් වන නිසා ඔබට කිසිදු සැකයකින් තොරව මෙම ස්ථානයේදී එම පානීය වර්ග රැසක් තෝරා බේරා ඇනවුම් කළ හැකිය.

Bowl’d අවහන්හලේ   අහාර  වට්ටෝරුව දෙස බලා සිටීමට ප්‍රිය උපදවන්නේ එය විවිධ වර්ග සිතුවම්වලින් අනූන ප්‍රිය උපදවන වට්ටෝරුවක් නිසාය. අපගේ මෙම වීගන් ආහාර සමාලෝචනය අතරවාරයේදීද ඔබට එය කියවා බැලිය හැකි වේ. වීගන් ආහාර ගැනීමට මෙම ස්ථානයට එන ඔබ මෙම ආහාර වට්ටෝරුව හොදින් බලන්නත් අමතක කරන්න එපා. සුරම්‍යයත්, තඩ්සාජනීත් මමත් එය පෙරලා බැලුවේ ඉතා අසාවෙන්. හැබැයි සුරම්‍යයාට අප අපගේ ආහර ඇනවුම භාරදෙන්න යෝජනා කළා.

තඩ්ෂාජනී ස්ට්‍රෝබෙරි කොමඩු දෙහි සහිත පානය (රු. 400) ඇණවුම් කළාය. සුරම්‍යා  දෙහි සහිත ගොටුකොල යුෂ පානය (රු. 300) තෝරාගත්තාය. මම ඔවුන්ට ඉඩ දී අහාර වට්ටෝරුවට ඇස යැව්වෙමි. සුපර්ෆුඩ් මිසෝ සුප් (රු. 550) තඩ්ෂාගේ තේරීම වූ අතර සුරම්‍යා ෂෝයු ටෝෆු පාත්‍රය (සාමාන්‍ය රු. 750) ඇනවුම් කළාය.

මම මොකටද අමුතුවෙන් ඇනවුම් කරන්නෙ. අද ඔයාලා තෝරපු ආහාර කාලා බලලා ඒවයේ රස මම කියනවා මගේ අදහස එවැන්නකි. සාම්ප්‍රදායිකව සිදුරු බඳුන්, ඇලෙන සුළු බත් සමග අපගේ ආහාරය පිරිනමනු ලැබිණි. ඒ ඇනවුම අපි තුන්දෙනාටම මනාව සරිලයි. සුරම්‍යා ඇලෙන සුළු බත් සමග zoodles තෝරා ගෙන රසවිදින්නට වුවාය.

ක්ෂණිකව ක්‍රියාත්මක වී අපගේ අහාර ඇනවුම ලැබු බවත් සේවාදායකයා අහාර වට්ටෝරුව  පිළිබඳ මනා දැනුමකින් යුක්ත වී සිටි බවත් ඔබගේ පහසුව සදහා දැනුවත් කළ යුතු යැයි මම යෝජනා කළෙමි.

ඔවුන් අපට  බීම වර්ග පිරිනැමුවේ උණ බට සමගය. තිරසාර අහාර පරිභෝජනය සමග පරිසර හිතකාමී මෙවැනි දෑ ගැන අප ඔබට විටින් විට සහිපත් කර ඇත්තෙමු. සුරම්‍යා පොඩ්ඩක් රස බලන්න ගත්ත ගොටුකොළ යුෂ පානය ඔබට පෙන්වීමට ඡායාරූපයක් ගැනීමටත් පෙර තව පොඩ්ඩෙන් හිස්වෙයි. මගදි නැවැත්වු නිසා, මේ තරමින් ඡායාරූපයක් ඔබට ඉදිරිපත් කරන්නට හැකි වු බව මම ලියලා කියලා දැනගත්තොත්, සුරම්‍යා මාව මීළග සමාලෝචනයට රැගෙන නොයනු ඇත.  

නමුත් සුරම්‍ය එහෙම නෑ ඇත්තම කියනවා. බලන්න රමේෂ් මේකේ රස. මට අදහාගන්න බැහැ යැයි සුරම්‍යා කීවාය. තඩ්ෂාජනීටත් අපි එහි රස බලන්නට යෝජනා කළෙමු. ඇයත් ඇස් උඩ යැව්වාය. මෙච්චර රසට ගොටුකොළ බොන්න ඇත්නම් එය දිනපතා වුවද කළ හැකියැයි මගේ සිත කියන්නට විය. ඒ අතර තඩ්ෂාජනී කොමොඩු පානයේ රස බැලුවාය.  අපත් ඇයගෙන් මොහොතකට කොමඩු පානය ඉල්ලා රස වින්දේය. 

Bowl’d අවහන්හලේ  යුෂ පාන  ඇණවුම් කිරීමේදී කිසිදු බියක් දක්වන්න එපා යැයි කියන තරමට ඒවා රසවත්ය.  ඒ අතරවාරයේ අනෙකුත් එළවළු ආහාර ඇණවුමද මේසය මතට ආවේය. මට මේ එළවළු බදුන දකින කොට පුදුම ආසාවක් දැනෙන්නෙ සුරම්‍යා කීවාය . 

ටෝෆු, එඩමාම්, තක්කාලි, කැරට්, රතු ගෝවා, මුහුදු පැලෑටි, ලූනු, තල ඇට, අච්චාරු දමන ලද ඉඟුරු සහ හැපෙනසුළු වින්ටන් සහිත මෙම පාත්‍රය තුළට සූඩ්ල්ස් පැමිණ තිබුණේ සුරම්‍යා කැමැති විධියටයි. ඇය ඒ නිසා ප්‍රීතියෙන් ඉපිල ගියාය. සුරම්‍යා පමණක් නොව අපිද එහි රස නිසා ඉපිල ගියෙමු.

තඩ්ෂාගේ සුපර්ෆුඩ් මිසෝ සුප්, පිඟානට එකතු කළ අතිරේක නිවිති සහ තල ඇටවලින් සතුටක් ගෙන දුන්නේය. නමුත් ලුණු මදක් වැඩිවීම නිසා ඇය එය ප්‍රතික්ෂේප කළාය. අවසානයේ එයට වගවුයේ මමය.  

මිසෝ සුප් ඇණවුම් කිරීමට පෙර ලුණු පමණට දාන්න නැතිනම් අඩුවෙන් දාන්න යැයි ඉල්ලීමක් කළත් කමක් නැහැ යැයි කියන්න කියලා අප ඔබට පුංචි ඉගියකුත් දෙනවා ඔන්න. එතන ගිහිං අපි කිව්වෙ කියලා කියන්න එපා හොදේ.

අතුරුපස නම් කන්න ඉඩ නෑ කියද්දි සුරම්‍යා අපි එහෙනම් එකක් ඇණවුම් කරලා බලමු යැයි යෝජනා කළාය. අපි ඊට හා යැයි කීවෙමු. සුරම්‍යා අමාරුවෙන් අපට ඇණවුම් කළත් අවසානයේ ඊට වග කියන්නේ අපිය. මැන්ගො නයිස්ක්‍රීම් Mango Nicecream (රු 600) අප හිත ගියේ වීගන් අයිස්ක්‍රිම් සදහාය. මේකට කිරි දාලා හදන්නෙ නෑ නේද සේවා දායකයාගෙන් සුරම්‍යා දෙතුන් වතාවක් ඇසුවාය.

අඹ නයිස්ක්‍රීම් එක මරු. සුරම්‍යා කීවාය. මට නම් එය තරමක්ය. තඩ්ෂාජනීට නම් එය ගානක් නැත. ඇත්තටම සුරම්‍යා නම් අඹ නයිස්ක්‍රිම් කන්නම නැවත Bowl’d අවහන්හලට  එන බව කීවාය. දැන් අපට ඇයගෙන් විමසන්න තිබෙන්නෙ ඇත්තටම අපට හොරාට ඒ පැත්තෙ ආයෙ ගියාද කියලයි. 

ඒ කෙසේ වෙතත් ඉඩක් තිබෙනවා නම් Bowl’d අවහන්හලේ  රවුමක්  දාලා එන්න. සුහදශීලි කාර්ය මණ්ඩලය,  ක්ෂණික සේවාව, රසවත් ආහාර නිසා ඔබත් වීගන් ලෝලියෙකු ලෙස මේ තැන්වලට ගිහිං තිබෙන්නම ඔනෑ යැයි කියන්නට තරම් මට සිත්වේ. අපි ගියෙ හැන්දෑවක , ආදරය වෑහෙන අයට නම් අපි Bowl’d අවහන්හලේ  ඇතුලට ගියාට, පිටත අර මල් වැල් තියෙන ගහ යට මරුවට තියෙවි කියලා මට හිතෙනවා. 

එහෙනම් අදට ගිහිං එන්නම්. වීගන් ආහාර එක්ක ජීවිතය රසවත් කරගන්න. ඔබට ජය!

මම,

රමේෂ් වරල්ලෙගම 

වීගන් කඩේ – Vegan Kade මැන්ගො චියා පුඩිං (Mango Chia pudding)

වීගන් කඩේ – Vegan Kade මැන්ගො චියා පුඩිං (Mango Chia pudding)

නිර්මාංශ ආහාර සොයාගෙන යන අපි නිර්මාංශ ආහාර නිෂ්පාදන ගැනත් එකසේ උනන්දු වෙනවා. ඒ Meatless Monday Sri Lanka Team එක විධියට ඔයාලට හොදම දේ සොයාදෙන්න වෙහෙසෙන නිසා. 

Vegan Kade ට ඇවිත් UK වලින් ගෙනාපු Vegan නිෂ්පාදන මිලට ගන්න වගේ කියලා අපි කිව්වොත් ලංකාවේ වීගන් දේවල් නැතිවද බ්‍රිතාන්‍යයෙන් වීගන් නිෂ්පාදන ගෙන්වන්නෙ කියලා ඇතමෙකු ප්‍රශ්න නගන්නත් පුළුවන්. 

ඔව් ඇත්ත. නමුත් ඇතමෙක්ට ලංකාවේ වෙළදපොලේ ගන්න නැති වීගන් නිෂ්පාදන රස බලන්න උවමනා වුණාම විදෙස් රටවල වීගන් නිෂ්පාදන සොයාගෙන යන කෙනෙකුට ඇත්තටම වීගන් කඩේ වගේ තැනක් ඉතාම ප්‍රයෝජනවත් කියලයි අප කල්පනා කළේ. ඒ නිසා වීගන් කඩේ පොප් අප් සේල් එකක් තියෙන තැනකට ගිහිං එයාලා හදපු වීගන් අතුරුපසක රහත් බලලා ඒ ගැන විස්තරත් හොයාගෙන එන්න අප අමතක කළේ නැහැ. 

2019 දෙසැම්බර් 23  වීගන් කඩේ පොප් අප් සේල් එක තිබුණෙ හෝටර්න් පෙදෙසෙ අංක 31 දරණ ස්ථානයේදි. අපිත් මීට්ලස් මන්ඩේ ශ්‍රි ලංකා (Meatless Monday Sri Lanka) කණ්ඩායම විධියට මේ සුබ ආරංචිය හොයාගෙන වීගන් කඩේට ගොඩවැදුණා.

එක්සත් රාජධානියෙන් (UK) ගෙනාපු ගුණාත්මක ඒ වගේම රසවත් වීගන් අහාර වර්ග රැසක් Vegan Kade සමන්විත වෙලා තිබුණා. ඒ වගේම රසවත් වීගන් අතුරුපස රස විදලා යන්නත් අවස්ථාව උදාකර තිබුණා.

අපි නම් දවල් වෙන්න කලින් Vegan Kade ට ගියා. Meatless Monday Sri Lanka කණ්ඩායම මේ විස්තර කියන්නත් ආපු ගමන ගැන Vegan Kade හැමෝම සතුටු වුණා.

සුරම්‍යා නම් ඔන්න කඩේට ආපු ගමන් අපට තියෙන ඒ වගේම ඔයාලට තියෙන ප්‍රශ්න ඔක්කොම ඇහුවා. මම කිව්වා සුරම්‍යාට ඔය ඔක්කොම ඉංගිරිසි භාෂාවෙන් පළවන නිසා මමත් ඔන්න සිංහල පාඨකයන් වෙනුවෙන් මේ සටහන ලියලා තියෙනවා කියලා.

Vegan Kade දාලා තියෙන්නෙ ඩියාෂා. ඇය අපට පැහැදිලි කළා ඇයි වීගන් කඩේ දැම්මෙ කියලා. මේ හැමදේටම වඩා වටින්නෙ ඇය වීගන්වීම. ඒ වගේම වීගන් ආහාර ප්‍රචලිත කරන්න ඇය තබපු පියවර. ඩියාෂා කියන්නෙ ඇය සත්ත්ව කෘරත්වයට අකමැතියි කියලා. ඒ නිසාම වීගන් ආහාරවලට හුරුවුණ ඇය දැන් ඇය කන්න කැමැති කෑම ඇයගේ තේරීම, අනෙක් වීගන් පාරිභෝගිකයන්ටත් ගන්න උනන්දු කරනවා.

ඩියාෂා එක්ක මේ කණ්ඩායමේ ඉන්නවා රමීෂා, අනුකි වගේම රොෂී. ඒ හැමෝම අපි Vegan Kade ට ගිහිල්ල හිටිය කෙටි කාලයටත් කාර්ය බහුලයි. දේශිය ගැනුම් කරුවන් වගේම ලංකාවේ ජීවත්වන විදේශිකයන් වීගන් කඩේ සොයාගෙන පැමිණියා.


Vegan Kade ඩියාෂා ඇතුළු කණ්ඩායමට ඇත්තටම අරමුණක් තියෙනවා. ඒ සත්ත්ව හිංසනය පිටු දැකීම, ඒ වගේම නිර්මාංශ ආහාර රටාවකට තමන්ගෙ පරම්පරාවේ යහලු යෙහෙලියන් හුරු කිරීම. ලංකාවේ අනෙකුත් තැන්වලට වඩා ලාභෙට එක්සත් රාජධානියෙන් ගෙනාපු වීගන් ආහාර Vegan Kade තියෙනවා කියලා තමයි මොවුන් Meatless Monday Sri Lanka Team එකට විශ්වාසයෙන් පැවසුවේ.

ශාකජනක කිරිවර්ග,චොකලට්,වීගන් චීස්,ධාන්‍යවර්ග,වීගන් හැම් ඇතුළු තවත් බොහෝ දෑ වීගන් කඩෙන් මිලදී ගන්න පුළුවන්. අපේ පින්තූර බැලුවත් ඔයාලට ඒ නිෂ්පාදන හොදින් හදුනගන්න පුළුවන්වේවි.

Vegan Kade ට ඒ වගේම ඩියාෂා,රමීෂා,අනුකි සහ රොකීටත් සුබ පතනවා. කඩේ ආපහු දාපු දවසට හොයාගන්න ලෙහෙසිවෙන්න වීගන් කඩේ ගැන විස්තර පත්‍රිකාවත් මේ කතාව සමග අමුණන්න මම අමතක කරන්නෙ නැහැ.

අපි වීගන් කඩේට ගිහිං අපහු එන්න හදන වෙලාවේ ඩියාෂා අපට අතුරුපස ගෙනත් දුන්නා. ඉතා කුඩා අතුරුපස බදුනක් වුවත් එහි රස නම් ඉස්තරම්. 

මැන්ගො චියා පුඩිං (Mango Chia pudding)

සුරම්‍යත් මමත් ඉතා ආසාවෙන් මෙම පුඩිං රස බලන්න වුණා. පොල්, අඹ ඉතා සිහින්ව යොදාගනිමින් චියා සමග මිශ්‍රකරලයි ඩියාෂා මේ පුඩිම රසවත්ව හදලා තිබුණෙ.

චොකලට් චියා පුඩිං (chocolate chia Pudding)

වීගන් චොකලට් යොදා සැකසු චියා අන්තර්ගත අනෙක් පුඩිමත් ඒ වගේම රසවත්. සුරම්‍යත් මමත් මාරුවෙන් මාරුවට මේ රසවත් පුඩිං දෙකේම රස බැලු බව නොරහසක්.

සමහරු ආහාරවල සොයාගෙන යන්නෙ රස, තවත් සමහරු ගුණ. ඇතමෙක් මේ දෙකම ගැන අවබෝධයෙන් ආහාර ගන්න බව අපි දන්නවා. හැබැයි මේ කොයි පැත්තට මම වැටෙනවාද කියල පසුව හිතන්න උවමනායි. නමුත් වීගන් ආහාරවේලක් කියන්නෙම මාංශ ආහරයකට වඩා දහස් ගුණයකින් ඔබේ සෞඛ්‍යයට හිතකර ආහාරවේලක් බව නම් අමුතුවෙන් කිවයුතු නැහැ.

වීගන් කඩේ ගැන FB එකෙන් https://www.facebook.com/thevegankadeUK/ 

ඉන්ස්ටර් ග්‍රැම් වලින් https://www.instagram.com/thevegankade/ තොරතුරු ලබාගන්න හැකියාව තිබෙනවා.  ඔබටත් උනන්දුවක් තිබෙනවා නම් ඩියාෂා හෝ වීගන් කඩේ කාර්ය මණ්ඩලය සම්බන්ධ කරගෙන ඔබ සොයන ආහාර ද්‍රව්‍ය සොයා ගැනීමට හැකියාව තිබෙනවා. 

වීගන් කඩෙන් අදට සමුගත්තට තවත් වීගන් තියෙන කඩේකට ගිහිං කෑම වේලක් ගැන තොරතුරු අරන් එන පොරොන්දුවෙන් නවතිනවා. ජය! 

රමේෂ් වරල්ලෙගම

ඩෙසර්ට් බයි වීඅයිසී (Desserts by Vic)

ඩෙසර්ට් බයි වීඅයිසී (Desserts by Vic)

ඩෙසර්ට් බයි වීඅයිසී කියලා මම සිංහලෙන් ලියුවෙ ඉංගිරිසියෙන් කියවගන්න. වීඅයිසී වෙතින් පිදෙන අතුරුපස වගේ කියල සිංහලට හරවලා කියන්නත් පුළුවන්. ඒ ඔක්කොම ඇතෑරලා වීඅයිසී කියලා කිව්වත් වික් කියලා කිව්වත් නම අදුනගන්න පුළුවන්.

අද අපි මේ කියන්න යන්නෙ වීගන් අතුරුපස තිබෙන අපූරු නිවහනක් ගැන. මේ අතුරුපස නිවහන පිහිටලා තියෙන්නෙ අංක 24/10 ශ්‍රී සිද්ධාර්ථ පාර, කොළඹ 05 කියන ස්ථානයෙ. ඔන්න ඉතිං කියන්න එපා ඒක අවන්හලක් නෙමෙයි නිවසක්නේ කියලා.

අපි පැහැදිලිව කියනවා. ඔව් ඒක නිවසක්. හැබැයි ඔයාලා ආස කරන වීගන් අතුරුපස, විශේෂයෙන් වීගන් කේක් වර්ග රාශියක් තියෙන තැනක්.

නිවසක් තුළ නිර්මාණය වෙලා තියෙන Sri Lanka’s first Vegan Dessert Bar එකට ඔන්න අපි දෙන්නත් අවා. දැනටමත් දන්නවා ඔයාලා අපි දෙන්නා කිව්වාම සුරම්‍යා සහ මම. අඩුපාඩුව තඩ්සාජනී. ඇය යාපනයේ ගිහින්. නමුත් මේ රස විත්ති ඇයත් දෙමළ භාෂාවෙනුත් ඔබට ගෙන එනවා සිකුරුයි.

වීගන් අතුරුපස ගැන විශාල උනන්දුවක් තිබෙන සුරම්‍යා වීඅයිසී නිවහනට ඇතුළුවුණේ පුදුමයෙන් වගේ අතුරුපස දැකපු ගමන් එක කොනක ඉදන් අනෙක් කොනට යනකම් අතුරුපස. අපට කොතනින් පටන් ගෙන කොතනින් ඉවර කරන්නද කියලා හිතාගන්න බැරි තරම් අතුරුපස වර්ග රැසක් මෙතන තියෙනවා.

නිර්මාංශ ආහාර ගන්න බොහෝ දෙනෙකුට තිබෙන ප්‍රශ්නය තමයි ඔවුන් වීගන් නොවී වෙජිටේරියන් වීම. ඊට හේතුවෙලා තියෙන්නෙ බොහෝ විට කිරි සහ බිත්තර පවා නොමැති නිර්මාංශ ආහාර වේලක් ප්‍රධාන ආහාරවේලට එක්කර ගත්තත් අතුරුපස සොයනවිට බොහෝවිට කිරි, බිත්තර වලින් හදන ලද අතුරුපස කෑමට ගැනීම. මෙන්න මේ ප්‍රශ්නයට විසදුම් රැසක් වීඅයිසී ඩෙසර්ට් බා ඒකේ තියෙනවා කියලයි මට නම් හිතුනෙ.

මෙම ස්ථානයේ තවත් අපූර්වත්වයක් තියෙනවා. ඒ තමයි ‌මෙම අතුරුපස නිෂ්පාදන ව්‍යාපාරය පවත්වාගෙන යන්නෙ වික්. වික් ආහාර නිෂ්පාදන කේෂ්ත්‍රය ගැන උනන්දුවක් දක්වන්නෙ ඔහුත් වීගන්වීම නිසායි.

වෛද්‍යවරයෙකු ලෙස සේවය කරන්න ගියාම තමයි මම මේ බොහෝ ආහාරවල ගුණ අගුණ දැන ගත්තෙ. බොහෝ දෙනෙක් ආහාරවල තිබෙන ද්‍රව්‍ය ගැන සැළකිලිමත්නොවී ආහාර ගන්නවා. මම වීගන් වීමට තීරණය කළේ මගේ අත්දැකීම් හා ලැබුණු දැනුම අනුව. දැන් මට මගේම නිෂ්පාදනයක් ඔස්සේ රස වගේම ගුණ අතුරුපස ලබාදීමට හැකිවී තිබෙනවා යැයි වික් පැවැසීය.

Meatless Monday Sri Lanka කණ්ඩායම සමග වෙනත් දවසක දීර්ඝ සම්මුඛ සාකච්ඡාවකට එක්වීමට අප කළ ඇරයුමද වික් ඉතා සුහදශීලීව පිළිගත්තා. විද්‍යා කතා කරන්න පුළුවන් කියලා වික්ටම ඒ කටයුත්ත පැවැරුවා. 

බ්‍රව්නීස්,කප් කේක් සහ ඩෙසර්ට් කේක් දක්වා බොහෝ දේ වීඅයිසී අතුරුපස නිවසේ තියෙනවා. 

චොකලට් (Chocolate), වයිට් වෙල්වට් (White Velvet), චොකලට් ෆඩ්ජ් (Chocolate Fudge),ටිරාමිසු( Tiramisu), කොෆි කැරමල් කේක් (Coffee Caramel cakes) විවිධ වර්ගයේ කප් කේක් (cupcakes including triple chocolate, coffee cupcakes and the mocktail Pina Colada, Margarita cupcakes) ඒ අතර විශේෂිතයි.

අසුන් ගැනීමට තැනක් නොවුයෙන් අපි අතුරුපස මිලදීගෙන මෙම ස්ථානයෙන් නික්ම යා යුතුව තිබිණි. 

ඒ නිසා අප මිලට ගත් වික්ගේ ප්‍රියතම වයිට් වෙල්වට් කේක් කෑල්ල (රු.610) මාගරීටා කප් කේක් (රු.250)  සහ චොකලට් බ්‍රව්නී (රු.220) සදහා එක් ආයිතමයක මිල සටහන්ව තිබුණේ ඉහත පරිදිය. ඒ නිසා ඔබටත් මේ තැනට ඇවිල්ලාම තමන් ගන්න අතුරුපස වර්ගය තීරණය කර ගත හැකියි.

වීඅයිසී අතුරුපස නිවසට යන ගමන ඇතැම්විට ඔබට සංකීර්ණ වනු ඇත. නමුත් ගූගල් යෙදුම ඔස්සේ ඔබ ගමන් කරන්නේ නම් ඒ මාර්ගයේ වීඅයිසී නිවහන දක්වා ඊතල සටහන් ඔබේ පහසුව වෙනුවෙන් මග දෙපස යොදා ඇති බවත් සිහිපත් කළ යුතුයි.

ඒ විතරක් නෙමෙයි යුබර් ඊට්ස් (Uber Eats) ඔස්සේත් මෙම අතුරුපස නිවසටම ගෙන්වා ගැනීමේ පහසුව ඔබට තිබෙනවා.

ඔන්න සුරම්‍යත් මමත් නිවසට ගිහිං මෙම අතුරුපසවල රස බැලුවා. තවත් දවසක කන්න තියෙනවා නම් වගේ හැගීමක් ඇති කරන තරමට ඒවා රසවත්. ඒ නිසා අතුරුපසට ආස වීගන් හිතවතුන් හිතවතියන්ට මේ තැන කදිම තැනක් වේවි. 

Meatless Monday Sri Lanka කණ්ඩායම විධියට අපි නැවතත් මෙවන් තැනක අපේ අත්දැකීම් ඔබට කියන්න සුදානම්. හැමදාමත් වගේ වීගන්වීම ඔබට උතුම් නිරෝගීබව උදාකරතැයි විශ්වාසය තබමින් අදට නවතිනවා. ජය !