ගෝලීය උෂ්ණත්වය ඉහළයාම මගින් ගෝලීය ආහාර සැපයුම කෙරෙහි ඇතිකරන බලපෑම

ගෝලීය උෂ්ණත්වය ඉහළයාම මගින් ගෝලීය ආහාර සැපයුම කෙරෙහි ඇතිකරන බලපෑම

සූර්ය තාපය මගින් අප ජීවත්වන පෘථිවිය උණුසුම් වන බව සැවොම දන්නා කරුණක් වන අතර ජීවීන්ගේ පැවැත්මට සූර්ය ශක්තිය අත්‍යවශ්‍යම සාධකයකි. පෘතුවිය වෙත පතිත වන සූර්ය කිරණයන්ගෙන් 90% ක්ම නැවත වායු ගෝලය වෙත පරාවර්තනය වේ. හරිතාගාර වායු එනම් කාබන් ඩයොක්සයිඩ් (CO2), නයිට්‍රජන් ඔක්සයිඩ් (NO3), ඕසෝන් (O3), මීතේන් (CH4), ජල වාෂ්ප (H2O) සහ ක්ලෝරො ෆ්ලොරො කාබන් (CFC) වලට මෙම පරාවර්තනය වන සූර්ය කිරණ ග්‍රහණය කරගැනීමේ හැකියාවක් පවතින අතර පෘථිවිය ආසන්න වායු ගෝලයේ හරිතාගාර වායුව ඉහල යාම මගින් පරාවර්තනය වන සූර්ය කිරණ වැඩි ප්‍රමාණයක් ඉහල වායු ගෝලයට පරාවර්තනය නොවී පහල වායු ගෝලය තුල රැදී පවතින අතර එමගින් පහල වායු ගෝලය සහ පෘථිවියේ මතුපිට උෂ්ණත්වය ඉහල යාමට හේතු වේ.  වන විනාශය, ෆොසිල් ඉන්ධන දහනය සහ රසායනික ද්‍රව්‍ය භාවිතය වැනි මිනිස් ක්‍රියාකාරකම් හේතුවෙන් මෙම හරිතාගාර වායු විශාල වශයෙන් ඉහල යමින් පවතින අතර මෙය ජීවී පැවැත්මට විශාල තර්ජනයක් එල්ල කරමින් පවතී. වනාන්තර, කාන්තාර, උෂ්ණ කලාප, දූපත්, ධ්‍රැව, කඳු පද්ධති, තෙත් බිම්, වගුරු, වෙරළාශ්‍රිත වගුරුබිම් සහ කොරල් යන පරිසර පද්ධති වඩාත්ම අවධානම් කලාප වන අතර උෂ්ණත්වය මෙන්ම වර්ෂාපතනය, වලාකුළු, දේශගුණික විපර්යාස  මගින් මෙම පරිසර පද්ධති විශාල වශයෙන් අවධානමට ලක් වී ඇත. විශේෂයෙන්ම මෙම ලිපිය මගින් ගෝලීය ආහාර සැපයුම කෙරෙහි ගෝලීය උෂ්ණත්වයෙහි බලපෑම සාකච්චා කරන අතර ආහාර සුරක්ෂිතතාව මේ වන විට ලෝකයෙහි වඩාත් අවධානය යොමු වී ඇති මාතෘකාවකි. තිරසාර සංවර්ධන ඉලක්කයන් තුලද අන්තර්ගත වන කුසගින්න නැති කිරීම සහ තිරසාර පරිභෝජනය යන අංශ මගින් ගෝලීය ප්‍රජාව දැනටමත්  මුහුණ දෙමින් පවතින ආහාර අර්බුධය පෙන්නුම් කරනු ලබයි. 

  • ආහාර දාම මත පදනම් වූ පරිභෝජන රටාව

පෘථිවි ගෝලය තුල ආහාර පද්ධතිය, ආහාර දාමයන් මත ගොඩනැගී ඇත. ආහාර දාමයක් යනු එක් ජීවියෙකු තවත් ජීවියෙකු ආහාරයට ගන්නා විට පෝෂ්‍ය පදාර්ථ හා ශක්තිය ජීවීන් අතර ගමන් ගන්නා ආකාරය දක්වන රේඛීය අනුක්‍රමයකි. ගෝලීය ආහාර පද්ධතිය මෙවැනි ආහාර දාම සමුහයකින් බැඳි ආහාර ජාලයකි.  ආහාර දාමයන්  පිළිබඳව සැලකීමේදී සෑම ආහාර දාමයක්ම ශාක මත පදනම්ව ක්‍රියාත්මක වේ. එනම් ගෝලීය ආහාර පද්ධතිය තුල සෑම විටම ආරම්භය එසේ නැත්නම් නිශ්පාදකයා ශාකයකි. එම ශාකමය ආහාරය මත පදනම්ව ශාකභාක්ෂක, මාංශ භක්ෂක සහ සර්ව භක්ෂක පරිභෝජකයන් නිර්මාණය වේ. ආහාර දාමයේ පාමුල ප්‍රාථමික නිෂ්පාදකයින් සිටී. ප්‍රාථමික නිෂ්පාදකයින් බොහෝ විට ශාක, ඇල්ගී හෝ සයනොබැක්ටීරියා වැනි ප්‍රභාසංස්ලේෂක ජීවීන් වේ. ප්‍රාථමික නිෂ්පාදකයින් අනුභව කරන ජීවීන් ප්‍රාථමික පරිභෝජකයන් ලෙස හඳුන්වන අතර මෙම ජීවීන් සාමාන්‍යයෙන් ශාක භක්ෂකයන් වේ. ප්‍රාථමික පරිභෝජකයන් අනුභව කරන ජීවීන් ද්විතීයික පරිභෝජකයන් ලෙස හඳුන්වන අතර මෙම ජීවීන් මාංශ භක්ෂකයින් වේ. ද්විතියික පරිභෝජකයන් අනුභව කරන ජීවීන් තෘතියික පරිභෝජකයන් ලෙස හැඳින්වේ. මොවුන් රාජාලීන් හෝ විශාල මාළු වැනි මාංශ භක්ෂකයින් ආහාරයට ගන්නා මාංශ භක්ෂකයින් වේ. සමහර ආහාර දාමයන්හි අතිරේක මට්ටම් ඇත, එනම් චතුර්ථක පරිභෝජකයන් වන තෘතීයික පරිභෝජකයන් අනුභව කරන මාංශ භක්ෂකයින්ය. 

එක් ජීවියෙකු තවත් ජීවියෙකු අනුභව කර එම ජීවී ශරීරයෙන් ශක්තිය ලබා ගැනීම ආහාර දාමයෙදී සිදුවන අතර සාමාන්‍යයෙන් එක ජීවියෙකුගේ ශක්ති ප්‍රමාණයන්ගෙන් 10% ක ප්‍රමාණයක් පමණක් අනෙක් ජීවියාට ගමන් කරයි. එම නිසා දිගු ආහාර දාමයන් වල ශක්තීන් සම්ප්‍රේෂණය අකාර්යක්ෂම වේ.  මේ අනුව ප්‍රාථමික නිශ්පාදකයා තුල කිලෝ කැලරි 10000ක ශක්තියක් අන්තර්ගතව තිබුනේ නම් ප්‍රාථමික පරිභෝජකයාට කිලෝ කැලරි 1000ක්, ද්වීතික පරිභෝජකයාට කිලෝ කැලරි 100 ක්ද ගමන් කරයි. මෙයින් පැහැදිලි වන තවත් කරුණක් නම් ශාකමය ආහාර තුල ඉතා ඉහල ශක්තියක් ගැබ් වී ඇති බවයි. එබැවින් නිර්මාංශ ආහාර වලට වැඩිපුර නැඹුරු වීම තුලින් වැඩි ශක්තියක් ශරීරයට ලැබෙන අතර අප “නිර්මාංශ සඳුදා ව්‍යාපෘතිය” මගින් ප්‍රවර්ධනය කරනු ලබන මාංශ අනුභවය අඩු කිරීම කෙරෙහි උත්තේජනයක් මෙමගින් පැහැදිලි කරනු ඇත.  

  • ආහාර දාමයන් කෙරෙහි ගෝලීය උෂ්ණත්වය ඉහල යාම බලපාන ආකාරය   

ගෝලීය උෂ්ණත්වය ඉහල යාම සහ දේශගුණික විපර්යාස හේතුවෙන් වැඩිම අවධානමකට මුහුණ දෙන ක්ෂේත්‍රයක් ලෙස කෘෂිකර්මාන්තය හඳුනා ගත හැක. ගෝලීය උෂ්ණත්වය ඉහල යාම ඍජුවම ශාක වර්ධනය කෙරෙහි බලපාන අතර මේ හේතුවෙන් 10-50% ත් අතර ශාක වර්ධනයේ අඩුවීමක් දක්නට ඇති බව වාර්තා වේ. උෂ්ණත්වයේ ඉහල යාම මගින් ශාක වර්ධනය සඳහා අවශ්‍ය වන තෙතමනය, ජලය සීමා වන අතර එමගින් පසෙහි සාරවත් බව අඩුවීම ඇතිවී ශාක වර්ධනය අඩාල වේ. මීට අමතරව ගංවතුර, නියඟ, නායයාම් සහ සුනාමි වැනි ස්වභාවික විපත් හේතුවෙන් ද ප්‍රාථමික නිෂ්පාදනය අඩු වේ. එසේ ලෝකය තුල පවතින ශාකමය ආහාර වල අඩුවීමක් ඇති වුවහොත් එය ශාක භක්ෂක, මාංශ භක්ෂක සහ සර්ව භක්ෂක සියලු ජීවීන්ගේ පැවැත්මට ඍජු බලපෑමක් එල්ල කරනු ලබයි. මක්නිසාද යත්, ප්‍රාථමික නිෂ්පාදකයන් වන ශාක නොමැති විට ශාක භාක්ෂකයන්ගේ වර්ධනය සීමා වන අතර, ශාක භක්ෂකයන් අඩු වන විට මාංශ භාක්ෂකයන්ගේ වර්ධනය සීමා වේ. 

අවසානයේදී අවධාරණය කරගත යුතු කරුණක් වන්නේ, කුමන ආහාර රටාවක් අනුගමනය කලද සැමවිටම අප ශාකමය නිෂ්පාදයකුගෙන් ආරම්භ වන ආහාර දාමයක එක් පුරුකක් බවයි. එබැවින්, තිරසාර පරිභෝජන රටාවක් කරා යන ගමනේදී ශාකමය නිෂ්පාදකයන්  වර්ධනය කිරීම ගෝලීය ආහාර පද්ධතිය සුරක්ෂිත කිරීම සඳහා වඩාත් වැදගත් වේ. කෘෂිකර්මාන්තය සහ ගෙවතු වගාව ප්‍රවර්ධනය ඒ සඳහා විශාල දායකත්වයක් සපයනු ලබයි. එමගින් ඇති වනු ලබන ආහාර දාම මගින් විශාල ජීවීන් ප්‍රමාණයක් යැපෙනු ලබන අතර ගෝලීය ආහාර සැපයුම ඉහල නැංවීමටද දායක වේ. අවසන් වශයෙන්, පෘථිවිය තුල ජීවත් වන සියලු ජීවීන්ගේ පැවැත්ම තහවුරු වන තිරසාර ආහාර පරිභෝජන රටාවකට හුරු වීම අපගේ යුතුකමක් මෙන්ම වගකීමකි.  

වීගන් කඩේ – Vegan Kade මැන්ගො චියා පුඩිං (Mango Chia pudding)

වීගන් කඩේ – Vegan Kade මැන්ගො චියා පුඩිං (Mango Chia pudding)

නිර්මාංශ ආහාර සොයාගෙන යන අපි නිර්මාංශ ආහාර නිෂ්පාදන ගැනත් එකසේ උනන්දු වෙනවා. ඒ Meatless Monday Sri Lanka Team එක විධියට ඔයාලට හොදම දේ සොයාදෙන්න වෙහෙසෙන නිසා. 

Vegan Kade ට ඇවිත් UK වලින් ගෙනාපු Vegan නිෂ්පාදන මිලට ගන්න වගේ කියලා අපි කිව්වොත් ලංකාවේ වීගන් දේවල් නැතිවද බ්‍රිතාන්‍යයෙන් වීගන් නිෂ්පාදන ගෙන්වන්නෙ කියලා ඇතමෙකු ප්‍රශ්න නගන්නත් පුළුවන්. 

ඔව් ඇත්ත. නමුත් ඇතමෙක්ට ලංකාවේ වෙළදපොලේ ගන්න නැති වීගන් නිෂ්පාදන රස බලන්න උවමනා වුණාම විදෙස් රටවල වීගන් නිෂ්පාදන සොයාගෙන යන කෙනෙකුට ඇත්තටම වීගන් කඩේ වගේ තැනක් ඉතාම ප්‍රයෝජනවත් කියලයි අප කල්පනා කළේ. ඒ නිසා වීගන් කඩේ පොප් අප් සේල් එකක් තියෙන තැනකට ගිහිං එයාලා හදපු වීගන් අතුරුපසක රහත් බලලා ඒ ගැන විස්තරත් හොයාගෙන එන්න අප අමතක කළේ නැහැ. 

2019 දෙසැම්බර් 23  වීගන් කඩේ පොප් අප් සේල් එක තිබුණෙ හෝටර්න් පෙදෙසෙ අංක 31 දරණ ස්ථානයේදි. අපිත් මීට්ලස් මන්ඩේ ශ්‍රි ලංකා (Meatless Monday Sri Lanka) කණ්ඩායම විධියට මේ සුබ ආරංචිය හොයාගෙන වීගන් කඩේට ගොඩවැදුණා.

එක්සත් රාජධානියෙන් (UK) ගෙනාපු ගුණාත්මක ඒ වගේම රසවත් වීගන් අහාර වර්ග රැසක් Vegan Kade සමන්විත වෙලා තිබුණා. ඒ වගේම රසවත් වීගන් අතුරුපස රස විදලා යන්නත් අවස්ථාව උදාකර තිබුණා.

අපි නම් දවල් වෙන්න කලින් Vegan Kade ට ගියා. Meatless Monday Sri Lanka කණ්ඩායම මේ විස්තර කියන්නත් ආපු ගමන ගැන Vegan Kade හැමෝම සතුටු වුණා.

සුරම්‍යා නම් ඔන්න කඩේට ආපු ගමන් අපට තියෙන ඒ වගේම ඔයාලට තියෙන ප්‍රශ්න ඔක්කොම ඇහුවා. මම කිව්වා සුරම්‍යාට ඔය ඔක්කොම ඉංගිරිසි භාෂාවෙන් පළවන නිසා මමත් ඔන්න සිංහල පාඨකයන් වෙනුවෙන් මේ සටහන ලියලා තියෙනවා කියලා.

Vegan Kade දාලා තියෙන්නෙ ඩියාෂා. ඇය අපට පැහැදිලි කළා ඇයි වීගන් කඩේ දැම්මෙ කියලා. මේ හැමදේටම වඩා වටින්නෙ ඇය වීගන්වීම. ඒ වගේම වීගන් ආහාර ප්‍රචලිත කරන්න ඇය තබපු පියවර. ඩියාෂා කියන්නෙ ඇය සත්ත්ව කෘරත්වයට අකමැතියි කියලා. ඒ නිසාම වීගන් ආහාරවලට හුරුවුණ ඇය දැන් ඇය කන්න කැමැති කෑම ඇයගේ තේරීම, අනෙක් වීගන් පාරිභෝගිකයන්ටත් ගන්න උනන්දු කරනවා.

ඩියාෂා එක්ක මේ කණ්ඩායමේ ඉන්නවා රමීෂා, අනුකි වගේම රොෂී. ඒ හැමෝම අපි Vegan Kade ට ගිහිල්ල හිටිය කෙටි කාලයටත් කාර්ය බහුලයි. දේශිය ගැනුම් කරුවන් වගේම ලංකාවේ ජීවත්වන විදේශිකයන් වීගන් කඩේ සොයාගෙන පැමිණියා.


Vegan Kade ඩියාෂා ඇතුළු කණ්ඩායමට ඇත්තටම අරමුණක් තියෙනවා. ඒ සත්ත්ව හිංසනය පිටු දැකීම, ඒ වගේම නිර්මාංශ ආහාර රටාවකට තමන්ගෙ පරම්පරාවේ යහලු යෙහෙලියන් හුරු කිරීම. ලංකාවේ අනෙකුත් තැන්වලට වඩා ලාභෙට එක්සත් රාජධානියෙන් ගෙනාපු වීගන් ආහාර Vegan Kade තියෙනවා කියලා තමයි මොවුන් Meatless Monday Sri Lanka Team එකට විශ්වාසයෙන් පැවසුවේ.

ශාකජනක කිරිවර්ග,චොකලට්,වීගන් චීස්,ධාන්‍යවර්ග,වීගන් හැම් ඇතුළු තවත් බොහෝ දෑ වීගන් කඩෙන් මිලදී ගන්න පුළුවන්. අපේ පින්තූර බැලුවත් ඔයාලට ඒ නිෂ්පාදන හොදින් හදුනගන්න පුළුවන්වේවි.

Vegan Kade ට ඒ වගේම ඩියාෂා,රමීෂා,අනුකි සහ රොකීටත් සුබ පතනවා. කඩේ ආපහු දාපු දවසට හොයාගන්න ලෙහෙසිවෙන්න වීගන් කඩේ ගැන විස්තර පත්‍රිකාවත් මේ කතාව සමග අමුණන්න මම අමතක කරන්නෙ නැහැ.

අපි වීගන් කඩේට ගිහිං අපහු එන්න හදන වෙලාවේ ඩියාෂා අපට අතුරුපස ගෙනත් දුන්නා. ඉතා කුඩා අතුරුපස බදුනක් වුවත් එහි රස නම් ඉස්තරම්. 

මැන්ගො චියා පුඩිං (Mango Chia pudding)

සුරම්‍යත් මමත් ඉතා ආසාවෙන් මෙම පුඩිං රස බලන්න වුණා. පොල්, අඹ ඉතා සිහින්ව යොදාගනිමින් චියා සමග මිශ්‍රකරලයි ඩියාෂා මේ පුඩිම රසවත්ව හදලා තිබුණෙ.

චොකලට් චියා පුඩිං (chocolate chia Pudding)

වීගන් චොකලට් යොදා සැකසු චියා අන්තර්ගත අනෙක් පුඩිමත් ඒ වගේම රසවත්. සුරම්‍යත් මමත් මාරුවෙන් මාරුවට මේ රසවත් පුඩිං දෙකේම රස බැලු බව නොරහසක්.

සමහරු ආහාරවල සොයාගෙන යන්නෙ රස, තවත් සමහරු ගුණ. ඇතමෙක් මේ දෙකම ගැන අවබෝධයෙන් ආහාර ගන්න බව අපි දන්නවා. හැබැයි මේ කොයි පැත්තට මම වැටෙනවාද කියල පසුව හිතන්න උවමනායි. නමුත් වීගන් ආහාරවේලක් කියන්නෙම මාංශ ආහරයකට වඩා දහස් ගුණයකින් ඔබේ සෞඛ්‍යයට හිතකර ආහාරවේලක් බව නම් අමුතුවෙන් කිවයුතු නැහැ.

වීගන් කඩේ ගැන FB එකෙන් https://www.facebook.com/thevegankadeUK/ 

ඉන්ස්ටර් ග්‍රැම් වලින් https://www.instagram.com/thevegankade/ තොරතුරු ලබාගන්න හැකියාව තිබෙනවා.  ඔබටත් උනන්දුවක් තිබෙනවා නම් ඩියාෂා හෝ වීගන් කඩේ කාර්ය මණ්ඩලය සම්බන්ධ කරගෙන ඔබ සොයන ආහාර ද්‍රව්‍ය සොයා ගැනීමට හැකියාව තිබෙනවා. 

වීගන් කඩෙන් අදට සමුගත්තට තවත් වීගන් තියෙන කඩේකට ගිහිං කෑම වේලක් ගැන තොරතුරු අරන් එන පොරොන්දුවෙන් නවතිනවා. ජය! 

රමේෂ් වරල්ලෙගම

ඩෙසර්ට් බයි වීඅයිසී (Desserts by Vic)

ඩෙසර්ට් බයි වීඅයිසී (Desserts by Vic)

ඩෙසර්ට් බයි වීඅයිසී කියලා මම සිංහලෙන් ලියුවෙ ඉංගිරිසියෙන් කියවගන්න. වීඅයිසී වෙතින් පිදෙන අතුරුපස වගේ කියල සිංහලට හරවලා කියන්නත් පුළුවන්. ඒ ඔක්කොම ඇතෑරලා වීඅයිසී කියලා කිව්වත් වික් කියලා කිව්වත් නම අදුනගන්න පුළුවන්.

අද අපි මේ කියන්න යන්නෙ වීගන් අතුරුපස තිබෙන අපූරු නිවහනක් ගැන. මේ අතුරුපස නිවහන පිහිටලා තියෙන්නෙ අංක 24/10 ශ්‍රී සිද්ධාර්ථ පාර, කොළඹ 05 කියන ස්ථානයෙ. ඔන්න ඉතිං කියන්න එපා ඒක අවන්හලක් නෙමෙයි නිවසක්නේ කියලා.

අපි පැහැදිලිව කියනවා. ඔව් ඒක නිවසක්. හැබැයි ඔයාලා ආස කරන වීගන් අතුරුපස, විශේෂයෙන් වීගන් කේක් වර්ග රාශියක් තියෙන තැනක්.

නිවසක් තුළ නිර්මාණය වෙලා තියෙන Sri Lanka’s first Vegan Dessert Bar එකට ඔන්න අපි දෙන්නත් අවා. දැනටමත් දන්නවා ඔයාලා අපි දෙන්නා කිව්වාම සුරම්‍යා සහ මම. අඩුපාඩුව තඩ්සාජනී. ඇය යාපනයේ ගිහින්. නමුත් මේ රස විත්ති ඇයත් දෙමළ භාෂාවෙනුත් ඔබට ගෙන එනවා සිකුරුයි.

වීගන් අතුරුපස ගැන විශාල උනන්දුවක් තිබෙන සුරම්‍යා වීඅයිසී නිවහනට ඇතුළුවුණේ පුදුමයෙන් වගේ අතුරුපස දැකපු ගමන් එක කොනක ඉදන් අනෙක් කොනට යනකම් අතුරුපස. අපට කොතනින් පටන් ගෙන කොතනින් ඉවර කරන්නද කියලා හිතාගන්න බැරි තරම් අතුරුපස වර්ග රැසක් මෙතන තියෙනවා.

නිර්මාංශ ආහාර ගන්න බොහෝ දෙනෙකුට තිබෙන ප්‍රශ්නය තමයි ඔවුන් වීගන් නොවී වෙජිටේරියන් වීම. ඊට හේතුවෙලා තියෙන්නෙ බොහෝ විට කිරි සහ බිත්තර පවා නොමැති නිර්මාංශ ආහාර වේලක් ප්‍රධාන ආහාරවේලට එක්කර ගත්තත් අතුරුපස සොයනවිට බොහෝවිට කිරි, බිත්තර වලින් හදන ලද අතුරුපස කෑමට ගැනීම. මෙන්න මේ ප්‍රශ්නයට විසදුම් රැසක් වීඅයිසී ඩෙසර්ට් බා ඒකේ තියෙනවා කියලයි මට නම් හිතුනෙ.

මෙම ස්ථානයේ තවත් අපූර්වත්වයක් තියෙනවා. ඒ තමයි ‌මෙම අතුරුපස නිෂ්පාදන ව්‍යාපාරය පවත්වාගෙන යන්නෙ වික්. වික් ආහාර නිෂ්පාදන කේෂ්ත්‍රය ගැන උනන්දුවක් දක්වන්නෙ ඔහුත් වීගන්වීම නිසායි.

වෛද්‍යවරයෙකු ලෙස සේවය කරන්න ගියාම තමයි මම මේ බොහෝ ආහාරවල ගුණ අගුණ දැන ගත්තෙ. බොහෝ දෙනෙක් ආහාරවල තිබෙන ද්‍රව්‍ය ගැන සැළකිලිමත්නොවී ආහාර ගන්නවා. මම වීගන් වීමට තීරණය කළේ මගේ අත්දැකීම් හා ලැබුණු දැනුම අනුව. දැන් මට මගේම නිෂ්පාදනයක් ඔස්සේ රස වගේම ගුණ අතුරුපස ලබාදීමට හැකිවී තිබෙනවා යැයි වික් පැවැසීය.

Meatless Monday Sri Lanka කණ්ඩායම සමග වෙනත් දවසක දීර්ඝ සම්මුඛ සාකච්ඡාවකට එක්වීමට අප කළ ඇරයුමද වික් ඉතා සුහදශීලීව පිළිගත්තා. විද්‍යා කතා කරන්න පුළුවන් කියලා වික්ටම ඒ කටයුත්ත පැවැරුවා. 

බ්‍රව්නීස්,කප් කේක් සහ ඩෙසර්ට් කේක් දක්වා බොහෝ දේ වීඅයිසී අතුරුපස නිවසේ තියෙනවා. 

චොකලට් (Chocolate), වයිට් වෙල්වට් (White Velvet), චොකලට් ෆඩ්ජ් (Chocolate Fudge),ටිරාමිසු( Tiramisu), කොෆි කැරමල් කේක් (Coffee Caramel cakes) විවිධ වර්ගයේ කප් කේක් (cupcakes including triple chocolate, coffee cupcakes and the mocktail Pina Colada, Margarita cupcakes) ඒ අතර විශේෂිතයි.

අසුන් ගැනීමට තැනක් නොවුයෙන් අපි අතුරුපස මිලදීගෙන මෙම ස්ථානයෙන් නික්ම යා යුතුව තිබිණි. 

ඒ නිසා අප මිලට ගත් වික්ගේ ප්‍රියතම වයිට් වෙල්වට් කේක් කෑල්ල (රු.610) මාගරීටා කප් කේක් (රු.250)  සහ චොකලට් බ්‍රව්නී (රු.220) සදහා එක් ආයිතමයක මිල සටහන්ව තිබුණේ ඉහත පරිදිය. ඒ නිසා ඔබටත් මේ තැනට ඇවිල්ලාම තමන් ගන්න අතුරුපස වර්ගය තීරණය කර ගත හැකියි.

වීඅයිසී අතුරුපස නිවසට යන ගමන ඇතැම්විට ඔබට සංකීර්ණ වනු ඇත. නමුත් ගූගල් යෙදුම ඔස්සේ ඔබ ගමන් කරන්නේ නම් ඒ මාර්ගයේ වීඅයිසී නිවහන දක්වා ඊතල සටහන් ඔබේ පහසුව වෙනුවෙන් මග දෙපස යොදා ඇති බවත් සිහිපත් කළ යුතුයි.

ඒ විතරක් නෙමෙයි යුබර් ඊට්ස් (Uber Eats) ඔස්සේත් මෙම අතුරුපස නිවසටම ගෙන්වා ගැනීමේ පහසුව ඔබට තිබෙනවා.

ඔන්න සුරම්‍යත් මමත් නිවසට ගිහිං මෙම අතුරුපසවල රස බැලුවා. තවත් දවසක කන්න තියෙනවා නම් වගේ හැගීමක් ඇති කරන තරමට ඒවා රසවත්. ඒ නිසා අතුරුපසට ආස වීගන් හිතවතුන් හිතවතියන්ට මේ තැන කදිම තැනක් වේවි. 

Meatless Monday Sri Lanka කණ්ඩායම විධියට අපි නැවතත් මෙවන් තැනක අපේ අත්දැකීම් ඔබට කියන්න සුදානම්. හැමදාමත් වගේ වීගන්වීම ඔබට උතුම් නිරෝගීබව උදාකරතැයි විශ්වාසය තබමින් අදට නවතිනවා. ජය ! 

ද පියෝ කිචන් (The Pure Kitchen) – 78, රොස්මිඩ් පෙදෙස, කොළඹ -07

ද පියෝ කිචන් (The Pure Kitchen) – 78, රොස්මිඩ් පෙදෙස, කොළඹ -07

ලංකාවේ කොතන වුණත් හොද වීගන් ආහර තියෙන තැනැක් නම් අපට ඒ තැන තමයි සුන්දරම තැන. ද පියෝ කිචන්. Meatless Monday Sri Lanka Team එක ඔන්න පියෝ කිචන් එකත් හොයාගෙන ආවා.අපගේ ආයතයේ ඩෙනිස් මහත්මයා තමයි අපට මේ තැන ගැන මුලින්ම හෝඩුවාව දුන්නෙ.

අපිත් ඉතිං හොයාගෙන යන්න දක්ෂයි නේ. හොයන්නාට හම්බුවෙනවා  කියලා කතාවකුත් තියෙනවා නේ. ඉතිං ඔන්න සුරම්‍යාටත් මටත් මේ තැන සොයාගන්න ලැබුණා. අංක 78, රොස්මිඩ් පෙදෙස කොළඹ 07 කියන ලිපිනයට ආවනම් ඔන්න විශාල නාම පුවරුවක් තියෙනවා බිත්තියටම අල්ලලා. The Pure Kitchen කියලා තමයි ඒකේ ගහලා තියෙන්නෙ.

පියෝ කිචන් කිව්ව ගමන් ජාවත්ත පාරේ තිබුණ පියෝ කිචන් එක මතක් වෙන්න පුළුවන්. සෑහෙන කාලයක් මේ තැන දන්න අයට. නමුත් දැන් පියෝ කිචන් එක තියෙන්න රොස්මිඩ් පෙදෙසෙ අපි කිව්ව ලිපිනයේ. ඇත්තටම එකම කළමනාකරණයක් යටතේ තැන මාරුවීම විතරයි වෙලා තියෙන්නෙ.

සුරම්‍යා හරි අපූරුවට පියෝ කිචන් නාම පුවරුව බලාගන්න ලෙහෙසිම විධිය මාත් එක්ක කිව්වා. ඒ තමයි කිචන් කියන එකේ අයි අකුර වෙනුවට නාම පුවරුවේ තියෙන්නෙ තැඹිලි පාට  කැරට් අලයක්. දැන් ඔන්න එන විධිය. තැන අදුනගන්න පුළුවන් පහසුම විධියත් අපි ඔයාලට කිව්වා.

The Pure Kitchen

සුරම්‍යා සහ මම ගිනි මධ්‍යහ්නයේ තමයි පියෝ කිචන් සොයාගෙන ගියේ. හැබැයි පිවිසුමෙන් ඇතුලට ගියපු ගමන් අපගේ ගත සිත පිනවන සිසිලසක් දැනෙන්න වුණා. දැන් හිතෙන්න පුළුවන් වායුසමීකරණය නිසා ද කියලා, ඒ විතරක් නෙමෙයි ඇත්තටම පියෝ කිචන් තියෙන තැන අපූරු ගෘහ නිර්මාණය ප්‍රතිභාවක් තිබෙනවා. ගස්වැල් සමග ගිය සිතුවම් ඇදි බිත්ති ඒ තැනට අපූරු වටිනාමක් දී තිබෙනවා. විශාල ඉඩ කඩක් නැතිවුණත් අමුතු නිදහස් මේ තැනට ආවම දැනෙනවා.ඒ නිසාමද දන්නෙ නෑ අපි යනකොටත් යුවලක් ආහාර ගනිමින් විනෝදවෙනවා අපි දැක්කා.මෙතන එකවර ආහාර ගැනීමට ඉඩකඩ තියෙන්නෙ 10-12 දෙනෙකුට විතරයි.  ඒ නිසාද දන්නෙ නෑ Uber Eats වලට වැඩි ඉල්ලුමක් ඇති බව පෙනුණා. අප එහි ඇතුලට ගොස් වාඩිවෙන විටත් ඌබර් ඊට් ආහාර ඇණවුම් ගෙනයාමට පැමිණි දෙතුන් දෙනෙක් මුදල් අයකැමි මේසය අසල රැස්කමින් සිටියා.

මිත්‍රශීලී පිළිගැනීම 

ඒ මොන කාර්ය බහුලත්වය තිබුණත් පියෝ කිචන් වේටර්වරිය නැතිනම් මුදල් අයකැමි තරුණිය අපට ප්‍රමුඛත්වය දෙමින් අපගේ ඇණවුමට මුල් තැන දුන් බව නොකියාම බෑ. ඒ නිසා සුරම්‍යයත් අපගේ ආහාරවේල ඇණවුම් කිරීමට පෙර ඇයගෙන් වීගන් ආහාරවේලක අවශ්‍යතාව කියමින් ඒවාට යොදන අමු ද්‍රව්‍ය ගැන ඇයගෙන් ප්‍රශ්න කරනු ලැබුවා. නමුත් ඇයත් මේ ප්‍රශ්න කිරීම්වලට සාවදාන වෙමින් නිසි පිළිතුරු දීම අපගේ ආහාර උනන්දුව තවත් වැඩි කළා. ඇයගෙ අදහස් පවා ඇය අපට එකතු කළා. 

වීගන් අහාර වට්ටෝරු 

පියෝ කිචන් ආහාර වට්ටෝරුවේ වීගන් අහාර සදහා වෙනම ඉඩක් වෙන්කර තිබීම විශේෂයි. අපගේ වෙටර්වරිය ඒ සදහා අපට සාර්ථක ලෙස උපදෙස් දෙනු ලැබුවා. සුපිරි බදුන් (Super Bowls),විශේෂ(Specials) සලාද(Salads) සහ සෞඛ්‍ය හිතකර (healthy treats) ලෙස එහි කාණ්ඩ කිහිපයක් දක්නට ලැබුණා. 

මෙතන තිබෙන මාංශ ආහාර වට්ටෝරුව වීගන් ආහාරයක් ලෙස ඇණවුම් කිරීමේ විශේෂ හැකියාව තිබෙනවා.ඒ නිසා වීගන් අහාර ගන්න කෙනෙකුට  කිසිම කලබලයක් වෙන්න දෙයක් නැහැ.

 නිවිති පානය  (Spinach and Chia Green Juice)

ඇත්තටම මේ පානයේ හිමිකරුවාත් සොයා ගැනීමත් අපට උදව් කළ වේටර්වරියගේ වීම අප පුදුමයට පත්කළා. එය ඇත්තටම ඉතා රසවත් නවමු අත්දැකීමක් වුවා. සුරම්‍යාටත් මෙය නවමු අත්දැකීමක්. ඊටත් වඩා අප ප්‍රියකළේ ප්ලාස්ටික් බටවලින් තොරව ලෝහමය බටයක් සමග අපට මෙම පාලනය පිළිගැන්වීමයි.

කොමඩු පානය  (watermelon)

කොමඩු පානය විශේෂිත වු පානයක් නොවන බව මම දන්නවා. නමුත් අපි දෙන්නා විවිධත්වයට එක්ක කොමඩු පානයකුත් ඇණවුම් කළා. මම තමයි කොමඩු බොන්න ආස කරන්නෙ. ඒ නිසා මා වෙනුවෙන්ම එය වෙන්වුවත් සුරම්‍යාගේ නිවිති පානයෙන් රස බලන්න මම අමතක කළේ නැහැ.

ක්විනෝවා සලාදය (Quinoa Tabbouleh Salad)

ටෝෆු සමග රසවත්වන අහාර බදුනක් ගැන සුරම්‍යා උනන්දු වුවත් අවාසනාවකට එය ඒ මොහොතේ ලබාගැනීමට නොහැකි වුණා. ඒ නිසා ඇය ක්විනොවා සලාද බදුනට ප්‍රිය කළා. එහි ඉතා සිහින්ව එළවළු හා ඖෂධීය පැලෑටි  වර්ග රැසක් අඩංගුකරමින් සකස්කර තිබෙනවා. චීස් නොමැතිව මෙම ආහාරය රසවත් කරන්න සුපවේදීන් වගබලාගෙන තිබුණා. ක්විනෝවා සමග එළවළු මිශ්‍ර කර තිබීමත් ඔලිව් තෙල්,දෙහි, ලුණු සහ ගම්මිරිස් අවශ්‍ය පරිදි යොදා තිබීමත් මෙම ආහාර බදුනේ රස දෙගුණ තෙගුණ කරනු ලැබුවා.

සූඩ්ල්ස් (zoodles)

මම ඇණවුම් කළේ සුඩ්ල්ස් බදුනක්. සාමාන්‍යයෙන් මෙම බදුන කුකුළු මස් හා ඉස්සන් සමග නිර්මාණය කරන මාංශ ආහාර බදුනක්. නමුත් මගේ පෙරැත්තට එය වීගන්කොට නිර්මාංශ ආහාරවේලක් ලෙස ලබා දීමට පියෝ කිචන් සූපවේදීන් සමත් වුණා.ග්ලුටන් රහිත සෞඛ්‍ය සම්පන්න ආහාරවේලක් ලෙස මෙම අහාර බදුන සකසාදීම ගැන මම ඔවුන්ට ස්තුතිවන්ත වුනෙමි. තක්කාලි සෝස් සමග එය වඩාත් රසවත්විය.

ඉතා කෙටි වේලාවක් තුළ සියලු ඇණවුම් ලබා ගැනීමට හැකිවීමත්, දුම් දමන රස්නයෙන් අහාර පිළිගැන්වීම දුටු නිසාත් අපගේ හිතත් ආහාර සමග පිරී ගිය බව නොරහසක්.

වීගන් චොකලට් කේක් (Vegan Chocolate Cake)

අතුරුපස කෑමට තරම් ඉඩක් නොවුවත් පියෝ කිචන් විශේෂ වීගන් චොකලට් කේක් සදහා දැන්වීමක්ද පල කර තිබු නිසා අපට අපගේ Meatless Monday Sri Lanka Team එක විධියට ඒ ගැන ඔබට කිව යුතුයැයි හැගුණා. සුරම්‍යා මගෙන් ඇහුවා රමේෂ් මොකද කරන්නෙ කියලා. මම කිව්වා. අපි අරගෙන බලලා ඒ රස මිහිර ගැනත් කියමු කියලා. ඔන්න අපි වීගන් චොකලට් කේක් එකක් අරගෙන රස විදින්න වුණා. පුදුම රසක්. උණුසුම්ව පිළිගැන්වු කේක් කැබැල්ලක රහ දිව නහර පිනා ගියා. 

සුරම්‍යාට ප්‍රශ්න තියෙනවා. ඔන්න දැන් අහනවා මේ කේක් එක මෙහෙමද හැදුවෙ කියලා. Butter Boutique එකෙන් සපයන ලද අතුරුපස බව ඔන්න සුරම්‍යා දැන ගත්තෙ එහෙමයි. ඉතිං ඔන්න සුරම්‍යා වීගන් කෑම කන්න යන ගමන් මේ වගේ රහස් පරීක්ෂක වැඩත් කරනවා.

පියෝ කිචන් හිමිකාරිනියි රුක්ෂි නෙත්තිකුමාර Butter Boutique අතුරුපස අවන්හලත් ඇයගේමයි. ඒ නිසා ඉතිං සැකයක් තියාගන්න එපා පියෝ කිචන් ආවම ඒ කියන්නෙ සියලු දේවලින් අංග සම්පූර්ණ වෙන්නෙ එහෙමයි.

දැන් ඉහත මිල ගණන් ගැන දාලා නෑනේ කියලා කලබල වෙන්න එපා. අපි වට්ටෝරුව පිටින්ම ගහගත්ත පින්තූර බැලුවම ඔයාලට ඒ ගැන අදහසක් ගන්න පුළුවන්වෙයි. 

පියෝ කිචන් දුරකථන අංකය -0117597737  කතා කරලත් බොහෝ ප්‍රශ්න විසදගන්න පුළුවන් වෙයි. ඔබත් වීගන් රසිකයෙක් රසිකාවියක් නම් අප කියන තැන්වලට ගිහිං ඒවායේ රහ ගුණ බලන ගමන් ඔයාලා ගියපු අලුත් නවමු වීගන් අත්දැකීම් ගන්න පුළුවන් තැන් ගැනත් අපට කියන්න. ;

එහෙනම් අද සමුදෙන්නෙ පියෝ කිචන් එකට ආයෙ දවසක අලුත් තැනකින් වීගන් ආහාරවේලක රස මිහිර එක්ක හමුවෙනවා. සුවබර දවසක් ! ජය ! 

රමේෂ් වරල්ලෙගම 

හෙළ බොජුන් හළ  – ජය මාවත බත්තරමුල්ල – 1 කොටස

හෙළ බොජුන් හළ – ජය මාවත බත්තරමුල්ල – 1 කොටස

(

සොයන්නාට හම්බුවෙනවා කියලා කතාවක් තියෙනවා නේ. ඔන්න අපි ඔයලා දන්න තැනක් ගැන දීර්ඝ විස්තරයක් ඉදිරියට කියන්න හිතාගෙන ඉන්නෙ. එතකොට Meatless Monday Sri Lanka අපිව සොයාගෙන එන අයට මේ වගේ හොද තැන් හමුවෙනවා ස්ථීරයි. 

අද අපි ආවේ බත්තරමුල්ල හෙළ බොජුන් හළට. මෙතනට එන විධිය කියන්නම්. බත්තරමුල්ල මංසන්ධියේ සිට කොළඹ පැත්තට එහෙම නැත්නම් බොරැල්ල පැත්තට එනකොට සෙත්සිරිපාය ප්‍රධාන පිවිසුම ටිකක් පහුවෙනවත් එක්කම ජය මාවත කියලා මාවතක් තියෙනවා. 

අන්න ඒ මාවත දිගේ මීටර් 100-150 එනකොට කෘෂිකර්ම දෙපාර්තමේන්තුව පවත්වාගෙනයන හෙළ බොජුන් හළ ඔයාලට පේනවා. සුරම්‍යා මට කලින්ම ආවා. මමත් ඇවිත් සුරම්‍ය එක්ක මුලින්ම කළේ වටපිටාව ගැන මුලින්ම ඇහැ දාපු එක. දීර්ඝව දවස් ගණනක් බත්තරමුල්ල හෙළ බොජුන් හළ ගැන විස්තර කියන බලාපොරොත්තුව එක්ක. 

වීගන් කියලා විශාල ප්‍රසිද්ධියක් මෙතන නැතිවුණාට ඇත්තටම සියයට සියයක් නිර්මාංශ ආහාර රස කැවිලි සහ විවිධ පානයන් මෙම ස්ථානයෙන් ලබා ගන්න ඔබට පුළුවන්. මේ හැම ආහාරයක්ම සමහරවිට කොළඹට නුහුරු ගමට අවේනික කෑම වර්ග. ඒ නිසා ගමේ කෑම කන්න කැමැති අයටත් මෙතන ඊවුම් පිහුම් වෙන හැටිත් බලාගෙන උණු උණුවේ රස විදින්න හැකියාව තියෙනවා.

මේ තැනට එනකොට දැනගන්න උවමනා අනෙක් කාරණාව තමයි පේදුරුතුඩුවේ ඉදන් දෙව්න්දර තුඩුව වෙනකම් කෘෂිකර්ම දෙපාර්තමේන්තුව හදුන්වලා දුන්න හෙළ බොජුන් හළවල් තියෙනවා කියන කාරණය. අපි සෑම උත්සාහයක්ම ගන්නවා Meatless Monday Sri Lanka කණ්ඩායම විධියට මේ හැමතැනටම හැකි කාල වකවානුවක් තුළ ගිහිං එකිනෙකට වෙනස් විස්තර ඔයාලට කියන්න. 

බත්තරමුල්ල හෙළ බොජුන් හළ සතියේ දිනවල උදෑසන 7 සිට සවස 4 දක්වා විවෘතව පවතියි.  මෙහි අවට පරිසරය කුරුල්ලන් ගැවසෙන සුන්දර පරිසරයකින් යුක්තය. එය ආහාර වේලක් ගැනීමේදී හිතට දැනෙන මානසික නිදහස ද උදාකරනු නියතය.

හැබැයි ඔන්න වායුසමීකරණ සවි කරලා නෑ. හැබෑවටම තියෙන්නෙ ස්වභාවික වාතාශ්‍රය පමණයි. සුරම්‍ය තවත් දෙයක් මතක් කළා. ඒ මෙම ස්ථානය මුළුමනින්ම පවත්වාගෙන යන්නෙ කාන්තාවන් විසින් පමණයි. ආහාරවල ගුණාත්මක භාවය වගේම දැරිය හැකි සාධාරණ මිල ගණන් ඔබව විශ්මයට පත් කරනවාට සැක නැහැ.

හෙළ බොජුන් හළ බත්තරමුල්ලෙ ආරම්භවෙලා දැනට වසර පහක කාලයක් ගතවෙනවා.  සහල් ආශ්‍රිත නිෂ්පාදන රැසක් මෙම ස්ථානයෙන් මිලට ගත හැකියි. ආප්ප, ඉදිආප්ප, පිට්ටු පමණක් නෙමෙයි හබල පෙති, තොසේ, වඩේ, කෙටි ආහරවර්ග, අතුරු පස, රසකැවිලි මේ හැමදේම මෙතන තියෙනවා.

අපි අද ආපු වෙලාවේ ඉදන් බැලුවම වෙළෙන්දන් 17 දෙනෙක් පමණ විවිධ ආහාරවර්ග ඔබට ලිපෙන් බාන ඇසිල්ලෙන් දෙන්න සුදානමින් සිටියහ.

ගස්ලබු යුෂ පානය (රු.50)

ඉතාමත් නැවුම් ගස්ලබු යුෂ පානයක් මම මෙම ස්ථානයෙන් මිලට ගත්තේ රුපියල් 50 වැනි මුදලකටය. වෙළදපොළ වටිනාකම් අනුව ගත් කල මිලෙන් අඩු ගුණෙන් වැඩි මෙවැනි පානයක ඇති වටිනාකම අලුතින් කිය යුතු නැත.

දිවුල් පානය (රු.50) 

සුරම්‍යාගේ තේරීම වුයේ දිවුල් පානයයි. එයත් ඉතා රසවත් බව සුරම්‍යා දිවුල් පානය රස විදින ගමන් කීවාය.

ඉදිඅආප්ප, ව්‍යාංජන සහ වඩේ ( රු.70)

මගේ ආහාරවේලට මම තෝරාගත්තේ ඉදිආප්ප සහ ව්‍යංජනයකි. එම ව්‍යංනයද සුවිශේෂි එකකි. කෙහෙල්මුව සහ පරිප්පු මිශ්‍ර ඉතා රසවත් ව්‍යංජනයක් මා හට පිරිනැමිණි. එය වඩා රසවත් කර ගැනීමට පොල් සම්බෝල හැදි කිහිපයකුත් පිගානට එක්වුයේය. තවත් විශේෂත්වයක් කර ගැනීමට රුපියල් 20 ක මුදලකට මම වඩේ එකක්ද මිලට ගත්තේය.

පොල් රොටි ( රු.30)

සුරම්‍යා ඇණවුම් කළේ පොල් රොටිය. මේ පොල් රොටිවල පොල් පමණක් නොව මුකුණුවැන්න සහ කැරට් ද දමා තිබේ. 

පොලොස් කට්ලට් ( රු.25)

පොලොස් දමා හැදු මෙම කට්ලට් ඇසුරුම කඩල පිටි වලිනි. ඒ සදහා බිත්තර සාරුව ගා ගන්නේ වත් නැති බවට තහවුරුවකි. ඒ නිසා වීගන් ආහාර ගන්නා අයට කිසිදු බියක් විය යුතු නැත. 

සුරම්‍ය කුරක්කන් තොසෙ ඉල්ලා සිටියද වෙළදාමේ නිරත කාන්තාව මදක් හෝ උණුසුම් නොවු ඉතිරිව ඇති තොසේ දීම ප්‍රතික්ෂේප කළාය. ඒ අනුව ගත්කළ නැවුම් ආහාර නිරන්තරයෙන් ලබාදීමේ අරමුණක්ද හෙළ බොජුන් හළේ තිබේ. 

කා බී වටවිට බලමින් සිටින විට මට නම් තෙලේ බැදෙන පැණිවළල්ලක් නොකා බැරි විය. ඊට මම පාර හදා ගත්තේ බෙලිමල් එකක් බොමු යැයි යෝජනා කරමිනි. 

පැණි වළල්ලක්, බෙලි මල් වීදුරුවක් සහ හකුරු කැබැල්ලට වියදම්වන්නේ රුපියල් 40කි.  මේ සියලු ආහාරවල එකතුව ගත්තත් රුපියල් 300ක් පමණ දෙදෙනෙකුට හෙළ බොජුන් හළට ඇවිත් අතුරුපස සමග ආහාරවේලකට ප්‍රමාණවත්වය.

මේ වගේ හොද තැන් ගැන අපටත් කියන්න. අපි Meatless Monday Sri Lanka කණ්ඩායම සුදානමින් සිටින්නේ එවැනි තැන් සොයා යෑමටය. අදට සමුගන්නවා. නැවත හමුවන්නෙ මෙවැනිම වීගන් ආහාර වේලක් එක්ක. එතෙක් ඔබට සුබ හෙටක්!